विक्रोळीत दूषित पाणीपुरवठा

सकाळ वृत्तसेवा
मुंबई, ता. ४ : विक्रोळी येथील कन्‍नमवार नगरमध्‍ये दूषित पाणीपुरवठा होत असल्याच्या तक्रारीची पालिकेने गंभीर दखल घेतली आहे. या भागातील जलवाहिनीचे म्हाडाकडून प्रचलन व परिरक्षण केले जात असले तरी खबरदारीचा उपाय म्हणून महापालिकेने ५०० घरांमधील दोन हजार ६५८ नागरिकांचे आरोग्‍य सर्वेक्षण केले आहे.
कन्नमवार नगर येथील इमारत क्रमांक १४ व आजूबाजूचा परिसर हा ‘म्हाडा’अंतर्गत येतो. त्या ठिकाणी अस्तित्त्वात असलेल्या पालिकेच्या मुख्य जलवाहिनीमधून म्हाडा प्राधिकरणाच्या अंतर्गत पाणीपुरवठ्यासाठी असलेल्या भूमिगत टाक्यांमध्ये पाणीपुरवठा केला जातो. त्यानंतर परिसरात म्हाडा क्षेत्रात असलेल्या स्वतंत्र इमारतींना ‘म्हाडा’ प्राधिकरणाद्वारे पाणीवितरण व्यवस्थेतून पुरवठा केला जातो. त्यामुळे जलवाहिनीचे जाळे ‘म्‍हाडा’च्या मालकीचे असल्‍याने त्याचे प्रचलन व परिरक्षण केले जाते; पण खबरदारी म्हणून महापालिकेने दूषित पाणी गळतीच्या नेमक्या ठिकाणाचा शोध घेण्याचे काम हाती घेतले आहे. त्यासाठी अत्याधुनिक क्राऊलर कॅमेऱ्याचा वापर केला जात आहे.
-----------------------------------------
तिघानांच पाण्याची बाधा
कन्नमवार नगर आरोग्य केंद्रातील सहायक वैद्यकीय अधिकारी व इतर कर्मचाऱ्यांमार्फत कन्नमवार नगरमधील इमारत क्रमांक ६, ७, ८, १२, १८ मधील दोन हजार ६५८ जणांचे सर्वेक्षण करण्यात आले आहे. त्यापैकी तिघांना मळमळ आणि उलटी झाली आहे. तसेच महापालिका रुग्णालय किंवा खासगी दवाखान्यामध्‍ये जलजन्य संसर्ग रुग्णांची वाढ झालेली नसल्याचे प्रशासनाने स्पष्ट केले आहे.
-------------------------------------------
नमुने प्रयोगशाळेत तपासणीसाठी
दूषित पाणीपुरवठा होत असलेल्‍या इमारतीतील पाण्याचे नमुने घेण्‍यात आले असून पालिकेच्‍या प्रयोगशाळेत तपासणीसाठी पाठवण्‍यात आले आहेत. त्यावर प्राप्त होणाऱ्या अहवालानुसार पुढील योग्य ती प्रशासकीय कार्यवाही करण्यात येणार आहे. तसेच कन्नमवार नगर येथील स्थानिकांच्या आरोग्याकडे सातत्याने लक्ष ठेवण्यात येत आहे, असे महापालिका प्रशासनातर्फे स्‍पष्‍ट करण्‍यात येत आहे.
--------------------------------------------