श्री स्वामी समर्थ महाराजांचा प्रकटदिन साजरा

ठाणे, ता. ११ (बातमीदार) : अक्कलकोट स्वामी समर्थ महाराज सेवा संस्थेच्या वतीने ठाण्यात श्री स्वामी समर्थ महाराज प्रकटदिन सोहळा बुधवारी (ता. १०) मोठ्या उत्साहात साजरा करण्यात आला. या वेळी विविध कार्यक्रमांचे आयोजन करण्यात आले होते.
स्वामी समर्थ महाराजांच्या प्रकटदिनानिमित्त श्री अक्कलकोट स्वामी समर्थ महाराज सेवा संस्थेच्या वतीने आणि मंडळाचे संस्थापक अनिल बोर्डे यांच्या मार्गदर्शनाखाली ठाण्यातील पाचपाखाडी नामदेववाडी येथील साईदर्शन सोसायटीमध्ये असलेल्या स्वामी समर्थ मठात सोहळा साजरा करण्यात आला. यानिमित्त ९ ते ११ एप्रिलपर्यंत विविध कार्यक्रम घेण्यात आले. यामध्ये ९ एप्रिलला सकाळी प्रधान मंडल स्थापना आणि गणेश पूजन, सायंकाळी श्री स्वामी समर्थ भजन मंडळ यांचा सुस्वर भजन कार्यक्रम, १० एप्रिलला प्रकटदिन सोहळ्यानिमित्त सकाळी भूपाळी, श्रींच्या मूर्तीवर अभिषेक, स्वामी चरित्र वाचन, स्वामी जप, स्वामीयाग पुर्णंहुती, सामुदायिक हरिपाठ कार्यक्रम पार पडले. तर ११ एप्रिलला हभप रामदास महाराज थोरात यांचे काल्याचे कीर्तन झाले. कार्यक्रमासाठी संस्थापक अनिल बोर्डे, अध्यक्ष संगीता बोर्डे, कार्याध्यक्ष सुभाष चव्हाण, सचिव प्रदीप बैकर, खजिनदार ॲड अनघा बोर्डे-पवार, उपाध्यक्ष अपूर्वा वाघ, उपसचिव गणेश बनोटे, संतोष किंजळे, वैभव पवार, कुणाल पिंगळे, संतोष पवार आदींनी मेहनत घेतली.