अभिजात मराठी भाषा पाठपुरावा समितीची दुसरी बैठक

केंद्र व राज्यात मराठी भाषेसाठी एकाच वेळी पाठपुरावा
अभिजात मराठी भाषा पाठपुरावा समितीचा दुसऱ्या बैठकीत निर्णय

पुणे, ता. २९ : अभिजात मराठी भाषा पाठपुरावा समितीची सोमवारी (ता. २९) दुसरी बैठक महाराष्ट्र साहित्य परिषद, पुणे येथे आयोजित करण्यात आली होती. या सभेला अध्यक्ष ज्ञानेश्वर मुळे, सदस्य डॉ. सदानंद मोरे, डॉ. राजा दीक्षित, डॉ. लक्ष्मीकांत देशमुख, संजय नहार, सचिव डॉ. शामकांत देवरे आदी उपस्थित होते.

समितीच्या या बैठकीत आतापर्यंत झालेल्या कार्याचा आढावा घेण्यात आला. मराठीला अभिजात भाषेचा दर्जा मिळावा, म्हणून केंद्रीय सांस्कृतिक खात्याच्या सचिवांशी व साहित्य अकादमीशी समितीच्या अध्यक्षांनी त्वरित संपर्क करावा, असा निर्णय यावेळी घेण्यात आला. दिल्लीत संबंधित सांस्कृतिक मंत्री आणि सचिव यांच्याबरोबर समितीने जूनमध्ये बैठक घेण्याचे ठरविण्यात आले असून विधानसभा निवडणुका जाहीर होण्याआधी या मागणीचा पाठपुरावा शासकीय पातळीवर पत्राद्वारे, त्याचप्रमाणे सामाजिक पातळीवर करण्याचे यावेळी ठरविण्यात आले. दिल्ली आणि महाराष्ट्र राज्य अशा दोन्ही ठिकाणी पाठपुरावा केल्याने समस्येबाबत अधिक वेगाने वाटचाल होऊ शकेल, असा चर्चाही समितीच्या या बैठकीत झाली. दरम्यान, अभिजात भाषा पाठपुरावा समिती यांच्या मार्गदर्शनाने केंद्रातील सांस्कृतिक कार्य विभागाशी अभिजात भाषेच्या मागणीसंदर्भात लवकरच पत्रव्यवहार करण्यात येणार असल्याची माहिती समितीचे सचिव डॉ. शामकांत देवरे यांनी दिली.

..
मराठी भाषा अभिजात भाषेच्या सर्व अटी पूर्ण करते. १२ कोटींच्या महाराष्ट्राची एकमुखी मागणी आहे. सर्व पक्षांचा याला पाठिंबा आहे. सर्वांच्या प्रयत्नाने हे कार्य यशस्वी करणार आहोत.
- ज्ञानेश्वर मुळे, अध्यक्ष, अभिजात भाषा पाठपुरावा समिती