‘हार्बर’वर लोकल घसरली

‘हार्बर’वर लोकल घसरली
गाड्या तीन तास ठप्प; प्रवाशांचे हाल

सकाळ वृत्तसेवा
मुंबई, ता. २९ : आठवड्याच्या पहिला दिवशी सीएसएमटी रेल्वे स्थानकादरम्यान लोकलचा एक डबा रेल्वे रुळांवरून घसरल्याची घटना घडली. या घटनेत सुदैवाने कोणतीही जीवितहानी झाली नाही; मात्र तब्बल तीन तास हार्बर मार्गवरून सीएसएमटीकडे जाणाऱ्या लोकल सेवा ठप्प होत्या. त्यामुळे हार्बर मार्गावरील ८२पेक्षा जास्त लोकल फेऱ्या रद्द, तर अनेक लोकल फेऱ्या विलंबाने धावत असल्याने मुंबईकरांचे प्रचंड हाल झाले.
मध्य रेल्वेने दिलेल्या माहितीनुसार, सोमवारी सकाळी १०.०५ वाजता पनवेलवरून लोकल सीएसएमटीच्या दिशेने निघाली होती. सकाळी साडेअकराच्या सुमारास ही लोकल सीएसएमटी येथे फलाट क्रमांक दोनवर येत असताना एका डब्याचे चाक रुळावरून घसरले. त्यामुळे हार्बर मार्गावरील लोकल सेवा ठप्प झाली. त्यामुळे हार्बर मार्गवरून सीएसएमटीकडे जाणाऱ्या लोकल सेवा एकामागे एक उभ्या होत्या. लोकलमध्ये प्रवासी अडकून पडल्याने अनेकांनी लोकलखाली उड्या मारून रेल्वे रुळांवरून पायपीट करत नजीकचे स्थानक गाठले. या घटनेची माहिती मध्य रेल्वे नियंत्रण कक्षाला मिळताच रेल्वेच्या अभियांत्रिकी पथकाने घटनास्थळी धाव घेतली. रेल्वे रुळावरून घसरलेला लोकल ट्रेनचे चाक पुन्हा रेल्वे रुळावर आणण्यासाठी युद्धपातळीवर प्रयत्न सुरू केले. यादरम्यान सीएसएमटीच्या दिशेने जाणाऱ्या लोकल मस्जिद स्थानकापर्यंत आणल्या जात होत्या. त्यानंतर अनेक लोकल वडाळ्यापर्यंतच आणून पुन्हा परतीच्या प्रवासासाठी पनवेल, बेलापूर मार्गस्थ करण्यात आल्या.
...
तब्बल तीन तासांनंतर लोकल रवाना
मध्य रेल्वेच्या अभियांत्रिकी पथकाने सकाळी ११.४५ वाजता घटनास्थळी दाखल होत दुरुस्तीचे काम वेगात सुरू केले. दुपारी १.१५ मिनिटांनी घसरलेला डबा पुन्हा रुळावर आणण्यात आला. त्यानंतर अपघातग्रस्त लोकल एक वाजून ५५ मिनिटांनी सीएसएमटी स्थानकात आणण्यात आली. त्यानंतर रेल्वे रूळ लोकल धावण्यासाठी सज्ज आहे की नाही याची शहानिशा झाल्यानंतर दुपारी ३.०६ वाजता सीएसएमटीहून बेलापूरसाठी पहिली ट्रेन रवाना करण्यात आली.
...
८०पेक्षा जास्त फेऱ्या रद्द
या घटनेमुळे सोमवारी सायंकाळी सहा वाजून १६ मिनिटांपर्यंत हार्बर मार्गावरील ५२ लोकल फेऱ्या रद्द करण्यात आल्या होत्या, तर २६ लोकल फेऱ्या वडाळा स्थानकांवर शॉर्ट टर्मिनेट करण्यात आल्या. याशिवाय वडाळा ते पनवेल- बेलापूर धावणाऱ्या लोकल १५ ते २० मिनिटे उशिराने धावत होत्या. पनवेलहून वडाळा दिशेने जाणाऱ्या लोकलदेखील १५ ते २० मिनिटे उशिराने धावत होत्या. विशेष म्हणजे, रात्री उशिरापर्यंत हार्बर मार्गावरील ८०पेक्षा जास्त लोकल फेऱ्या रद्द झाल्याने प्रवाशांना लोकल गर्दीचा सामना करावा लागला.
...
मध्य रेल्वेलाही फटका
या घटनेमुळे सीएसएमटी ते वडाळा अप मार्गावरील लोकल एकामागे एक खोळंबल्या होत्या. त्यामुळे तीन- चार लोकल मस्जिद स्थानकाच्या मुख्य मार्गावरून सीएसएमटीकडे आणण्यात आल्या. त्याच्या फटका मध्य रेल्वेच्या धीम्या मार्गावर दिसून आला. दुपारी एक ते अडीच वाजेपर्यंत सीएसएमटीकडे जाणाऱ्या धीम्या लोकल २० ते ३० मिनिटे उशिराने धावत असल्याने प्रवाशांचे हाल झाले आहेत.
...
चौकशीचे आदेश
या घटनेनंतर मध्य रेल्वेने तत्काळ चौकशी समितीची स्थापना करून चौकशीचे आदेश दिले. अपघातग्रस्त लोकल ट्रेनच्या मोटरमन आणि गार्डचा जबाब नोंदविण्यात आलेला आहे. ही घटना रेल्वे रुळाच्या पॉइंट फेलमुळे झाल्याची प्राथमिक माहिती समोर येत आहे; परंतु हा अपघात नेमका कसा घडला, हे चौकशी समितीचा अहवाल आल्यावर सांगणे शक्य होणार असल्याची माहिती मध्य रेल्वेच्या वरिष्ठ अधिकाऱ्यांनी ‘सकाळ’ला दिली.
...
प्रवाशांना इजा नाही
अपघातग्रस्त लोकलमध्ये बसलेल्या प्रवाशांना जोरदार झटका बसला. त्यामुळे काही काळ प्रवाशांमध्ये अस्वस्थता निर्माण झाली होती. चालकाने नियंत्रण मिळवत लोकल ट्रेन थांबवण्यात यश मिळवले. लोकल थांबताच प्रवाशांनी रेल्वे रुळावर उड्या घेतल्या. रेल्वे रुळावरून चालत सीएसएमटी स्थानक गाठले. या घटनेत कुठल्याही प्रवाशाला इजा झाली नसल्याची माहिती अपघातग्रस्त लोकलमधून प्रवास करणाऱ्या प्रवाशांनी दिली.