दहा लाख रुपयांपर्यंत जप्त रक्कम प्रकरणी त्रिसदस्यीय समिती

सकाळ वृत्तसेवा
मुंबई, ता. ३० : लोकसभा निवडणुकीच्या पार्श्वभूमीवर उमेदवारांच्या निवडणूक खर्चावर निवडणूक आयोगाकडून देखरेख ठेवण्यात येत आहे. त्यासाठी लोकसभा मतदारसंघातील विधानसभा क्षेत्रात नियुक्त केलेल्या विविध पथकांकडून व पोलिस पथकांनी केलेल्या कार्यवाहीमध्ये १० लाख रुपयांपर्यंतची प्रकरणे जलद गतीने सोडवण्यासाठी व याबाबत निर्णय घेण्यासाठी त्रिसदस्यीय समिती नेमण्यात आली आहे. यासाठी मुंबई उपनगर जिल्हाधिकारी तथा जिल्हा निवडणूक अधिकारी यांनी त्रिसदस्यीय रोख रक्कम सोडवणूक समिती (कॅश रिलीज कमिटी) गठित केली आहे. या रकमेच्या मर्यादेत जप्त केलेल्या प्रकरणांमध्ये संबंधितांना या समितीकडे दाद मागता येणार आहे. निवडणूक आयोगाच्या निर्देशानुसार खर्च नियंत्रण विषयांतर्गत रोख रक्कम सोडवणूककरिता ही समिती गठित करण्यात आली आहे. त्यामध्ये सहआयुक्त अंबरनाथ खुले हे अध्यक्ष तर सहायक आयुक्त विश्वास मोटे आणि अधिदान व लेखाधिकारी विलास गांगुर्डे हे सदस्य असणार आहेत. तर त्रिसदस्यीय समितीचे कार्यालय हे महसूल भवन सभागृह, गुरुनानक रुग्णालयाच्या पाठीमागे, वांद्रे (पूर्व) येथे असणार आहे.