भाजप २८ तर शिवसेना शिंदेगट १५

ठाणे नाशिक सेनेकडे, भाजप लढणार पालघर?
सकाळ न्यूज नेटवर्क
मुंबई, ता.३० ः कित्येक दिवस रखडलेले महायुतीचे जागावाटप अखेर मार्गी लागण्याची चिन्हे आहेत. ठाणे आणि नाशिक हे दोन मतदारसंघ शिवसेना शिंदे गटाकडे तर पालघर मतदारसंघ भाजपकडे येण्याची शक्यता आहे.

ठाणे लोकसभा मतदारसंघाबाबत भाजपने अद्याप दावा सोडलेला नाही. संजीव नाईक यांचे नाव चर्चेत आहे. मात्र आज मुख्यमंत्री एकनाथ शिंदे यांनी नरेश म्हस्के, प्रताप सरनाईक आणि रवींद्र फाटक यांच्याशी रात्री उशीरापर्यंत चर्चा सुरू ठेवली होती. नाशिक मतदारसंघात हेमंत गोडसे यांनाच संधी द्यावी असे सुरू आहे. पालघर मतदारसंघ भाजपकडे येण्याची शक्यता असून तेथे राजेंद्र गावित किंवा प्रकाश निकम यांना उमेदवारी दिली जाईल असे समजते. ऐनवेळी बहुजन विकास आघाडीचा उमेदवार भाजपतर्फे रिंगणात उतरेल. आज सुरू असलेल्या चर्चा प्रत्यक्षात आल्या तर भाजप २८, शिवसेना १५ तर राष्ट्रवादी कॉंग्रेस अजितदादा ४ आणि रासप १ जागा लढेल.

भाजप अद्याप आशावादी
भाजपने अजूनही ठाणे मतदारसंघावरील दावा सोडलेला नाही. ही जागा मिळावी यासाठी प्रयत्न सुरू आहेत. वेळप्रसंगी संजीव नाईक यांनी धनुष्यबाणावर लढावे, अशी रचना प्रत्यक्षात येण्याचीही चर्चा आहे.