पोहण्याची हौस बेतली जीवावर

अंबरनाथ, ता. १० (बातमीदार)ः वाढत्या उन्हाच्या तडाख्यात पोहोण्याचा आनंद घेण्यासाठी गेलेल्या दोघांचा बुडून मृत्यू झाला आहे. चिखलोली धरण आणि जीआयपी तलाव परिसरात गुरुवारी सायंकाळी ही घटना घडली आहे.
उन्हाचा तडाखा वाढल्याने अनेक हौशी पर्यटक पोहण्याचा आनंद घेण्यासाठी नद्या, धरणपात्रात पोहोण्यासाठी येत आहेत. अंबरनाथच्या चिखलोली धरणात उल्हासनगरच्या तरुणाचा; तर रेल्वेच्या जीआयपी टॅंक धरणात कल्याणच्या तरुणाचा बुडून मृत्यू झाला आहे. गुरुवारी सायंकाळी ही घटना घडली. उल्हासनगर येथे राहणारा रोहित कामसिंग (१७) हा त्याच्या मित्रांसह अंबरनाथच्या चिखलोली धरणपात्रात पोहण्यासाठी उतरला होता; पण पाण्याच्या अंदाज नसल्याने तो बुडाला. त्याच्या मित्रांनी त्याला वाचवण्याचा प्रयत्न केला. मात्र, त्यांना अपयश आले. या घटनेची माहिती मिळताच अंबरनाथ अग्निशमन दलाच्या जवानांनी शोधमोहीम राबवली होती; तर दुसऱ्या घटनेत कल्याणच्या काटेमानिवली परिसरात राहणारा केतन ठाकूर याचा जीआयपी टॅंक परिसरात पाण्याच्या अंदाज न आल्याने बुडून मृत्यू झाला. दोन्ही तरुणांचे मृतदेह शुक्रवारी पाण्याबाहेर काढल्याचे अंबरनाथ नगरपालिका अग्निशमन दलप्रमुख भागवत सोनोने यांनी सांगितले.