माधुरी काळे यांची उपजिल्हा संघटकपदी नियुक्ती

कल्याण, ता. ११ (वार्ताहर) : कल्याण पूर्वेतील विजयनगर गवळीनगर प्रभागाच्या शिवसेनेच्या माजी नगरसेविका माधुरी काळे यांची शिवसेना कल्याण पूर्व उपजिल्हा संघटकपदी नियुक्ती करण्यात आली आहे. कल्याण-डोंबिवली जिल्हाप्रमुख गोपाळ लांडगे यांनी पक्षाचे मुख्य नेते एकनाथ शिंदे यांच्या आदेशानुसार आणि खासदार डॉ. श्रीकांत शिंदे यांच्या सूचनेनुसार ही नियुक्ती करण्यात आली.
शालेय शिक्षण पूर्ण केल्यानंतर जनसेवेची आवड असलेल्या माधुरी काळे यांनी राजकारणात प्रवेश केला. त्यांना विजयनगर-गवळीनगर प्रभागातील जनतेने कल्याण-डोंबिवली महापालिकेत प्रभागाचे नेतृत्व करण्यासाठी प्रचंड मतांनी निवडून दिले होते. संघटन कौशल्य आणि प्रचंड जनसंपर्क असल्याने शिवसेना नेते मुख्यमंत्री एकनाथ शिंदे यांनी काळे यांच्यावर कल्याण पूर्व उपजिल्हा संघटक पदाची जबाबदारी सोपवली आहे.