अंबरनाथला वाऱ्यासह अवकाळी पावसाची हजेरी

अंबरनाथ, ता. १३ (बातमीदार) : अंबरनाथला सोसाट्याच्या वाऱ्यासह अवकाळी पावसाने हजेरी लावली. पावसामुळे वातावरणात किंचितसा गारवा जाणवला असला तरी अचानक आलेल्या पावसाने नागरिकांची तारांबळ उडाली. गेल्या अनेक दिवसांपासून कडक उन्हामुळे कमालीची उष्णता जाणवत होती. सोमवारी (ता. १३) दुपारी दोनपर्यंत कडक उन्हामुळे वातावरणात गरमी वाढली होती. दुपारी अचानक दोनच्या सुमारास मेघ दाटून आले, वारा सुटला आणि काही क्षणात अवकाळी पावसाच्या सरी कोसळू लागल्या. सोसाट्याच्या वाऱ्यामुळे शिवाजीनगर, वडवली आदी भागांत जुनी झाडे तुटली, काही ठिकाणी घरांवरील पत्रे उडून गेल्याचे प्रकार घडले. पाऊस, वाऱ्यामुळे काही ठिकाणी विद्युत तारांचे नुकसान झाल्याने दुपारी दोननंतर विद्युत पुरवठादेखील खंडित झाला होता.