वीटभट्टी व भाजीपाला उत्पादकांचे नुकसान

खर्डी, ता. १३ (बातमीदार) : खर्डी-कसारा परिसरात अवकाळी पावसामुळे वीटभट्टी व भाजीपाला उत्पादक शेतकऱ्यांचे अतोनात नुकसान झाले आहे. जोरदार वादळी-वाऱ्यामुळे अनेकांच्या घरांचे, लग्नमंडपाचे नुकसान झाले आहे. शहापूर पंचायत समितीच्या कार्यालयाशेजारी असलेले झाड कोलमडून मोटारसायकलवर पडल्याने सहा मोटारसायकलचे नुकसान झाले आहे. अजनुप, दहीगाव, कळमगाव, खर्डी, वेळूक-वाशाळा व आटगाव परिसरातील वीटभट्टी व्यावसायिकांच्या कच्च्या वीटांची माती झाल्याने त्यांचे आर्थिक नुकसान झाले आहे. तसेच येथील भेंडी, उडीद, वाल, हरभरा, तूर यांसारख्या पिकांवर रोग पडण्याची शक्यता निर्माण झाली आहे. आंबा व मोगरा बागायतदारांचे नुकसान झाले आहे. गुरांसाठी जमा करून ठेवलेला चारा भिजल्याने शेतकऱ्यांचे नुकसान झाले आहे.