पावसामुळे वीज खंडित, मोबाईलच्या उजेडात मतदान

पावसामुळे वीज खंडित, मोबाईलच्या उजेडात मतदान
पनवेल, ता. १३ (बातमीदार) : वादळी वाऱ्यासह पावसामुळे पनवेल तालुक्यातील जवळपास २० गावांतील वीजपुरवठा खंडित करण्यात आला होता. याचा फटका सोमवारी झालेल्या मतदानाला बसला. परिणामी जो मोबाईल मतदान केंद्रावर घेऊन जाण्यास मनाई होती त्याच केंद्रात मोबाईलच्या टॉर्चच्या साह्याने मतदान करण्याची वेळ मतदारांवर आली. तसेच अंधारात मतदान करण्यास अडथळा झाल्याने दोन ते अडीच तास मतदारांना ताटकळत उभे राहावे लागले; तर अनेक मतदारांनी मतदान न करता घरी जाणे पसंत केले.
अचानक आलेल्या अवकाळी पावसात वीज गेल्याने ग्रामीण भागातील मतदान केंद्रावर कर्मचाऱ्यांची एकच तारांबळ उडाल्याचे पाहायला मिळाले. प्रभाग क्रमांक एकमधील धानसर गावात मोबाईलच्या उजेडात मतदान प्रक्रिया पार पाडण्यात आली. मावळ लोकसभा मतदारसंघात मतदान प्रक्रियेदरम्यान दुपारच्या सुमारास अचानक पावसाने हजेरी लावली. या वेळी सोसाट्याच्या वाऱ्यामुळे लहान-मोठे वृक्ष कोसळण्याची शक्यता लक्षात घेत महावितरणकडून वीजपुरवठा खंडित करण्यात आला. परिणामी, ग्रामीण भागात असणाऱ्या मतदान केंद्रांत अंधार पडून मतदान प्रक्रिया काही काळ विस्कळित झाली होती. काही काळानंतर ग्रामस्थांनी आणलेल्या चार्जिंगच्या बॅटऱ्या आणि मोबाईल टॉर्चच्या उजेडात मतदान प्रक्रिया पूर्ण करण्यात आली.