असहकरामुळे ताब्यात घेता येणार नाही!

सकाळ वृत्तसेवा
मुंबई, ता. १४ : अमली पदार्थ तस्कर इक्बाल मिरची याच्याशी संबंधित मनी लाँडरिंग प्रकरणात सक्तवसुली संचालनालयाने लूक आऊट नोटीस बजावल्याने याप्रकरणी उच्च न्यायालयात धाव घेतलेल्या याचिकाकर्त्याला दिलासा मिळाला आहे. केवळ सहकार्य केले नाही म्हणून एखाद्या व्यक्तीला ताब्यात घेता येणार नाही, असे स्पष्ट करून न्यायालयाने त्याच्याविरोधातील लूक आऊट नोटीस रद्द केली.

संजय अग्रवाल असे याचिकाकर्त्यांचे नाव असून जानेवारी २०२१ मध्ये ईडीने त्याला लूक आउट नोटीस बजावली होती. अग्रवाल हे १९९५ पासून बहरीन आणि दुबई येथे काम करत असून ईडीने त्यांना लूक आऊट नोटीस बजावल्याने त्यांना देशाबाहेर जाता येत नाही. लुक आऊट नोटीस रद्द करण्यात यावी, अशी मागणी अग्रवाल यांनी याचिकेत केली होती. ईडीने या प्रकरणात त्यांचे नाव नसतानाही तपासात सहकार्य करत नव्हते, असा युक्तिवाद केला. न्या. रेवती मोहिते डेरे आणि न्या. मंजुषा देशपांडे यांनी ईडीचा हा दावा फेटाळून लावला.