जमिनीच्या वादातून भावाला सळईने मारहाण

जमिनीच्या वादातून भावाला सळईने मारहाण
रोहा, ता. १५ (बातमीदार) : सामाईक जमिनीतील माती काढू देत नसल्याच्या किरकोळ कारणावरून दोघा भावांमधील वाद उफाळून आला. त्यामुळे जमिनीच्या वादावरून ७० वर्षीय वृद्ध भावाला लोखंडी सळई व लाठी-काठीने जबर मारहाण केल्याची घटना रोहे तालुक्यातील कोलाड भागातील वाळंजवाडी येथे घडली आहे.
या प्रकरणी मारुती पांडुरंग वाळंज (वय ७०, रा. वाळंजवाडी, ता. रोहा) असे तक्रार दिलेल्या व्यक्तीचे नाव आहे. सोमवारी (ता. १३) सायंकाळी साडेसहा वाजण्याच्या सुमारास दुचाकीवरून कोलाडकडे जात असताना वाळंजवाडी बस स्टॉपजवळ आले होते. त्यावेळी आरोपी व त्यांचा सख्खा भाऊ सीताराम पांडुरंग वाळंज याने शेतातील माती काढण्यावरून वाद घातला. यावेळी सीताराम पांडुरंग वाळंज, यशवंत सीताराम वाळंज, हेमंत सीताराम वाळंज यांनी संगनमताने मारुती वाळंज यांना लाठीकाठीने मारहाण करून लोखंडी सळईने डोक्यावर हल्ला केला. यामध्ये मारुती वाळंज गंभीर जखमी असून वाद सोडवायला गेलेल्यांनाही मारहाण केली आहे. याप्रकरणी कोलाड पोलिसांत गुन्हा दाखल झाला असून पुढील तपास पोलिस करत आहेत.