ठाणे जिल्ह्यात कर्करोग माहिती केंद्र

डोंबिवली, ता. २१ (बातमीदार) : कर्करोगासंदर्भातील माहिती रुग्णांना एकाच ठिकाणी उपलब्ध व्हावी, तसेच रुग्ण आणि नातेवाईकांच्या मनात विश्वास, उमेद निर्माण व्हावी, यासाठी ठाणे जिल्ह्यात प्रथमच कर्करोग माहिती केंद्र उभारण्यात आले आहे. ठाण्यातील तीन हात नाका येथे हे केंद्र सुरू आहे. शहरातील आधाररेखा प्रतिष्ठानच्या माध्यमातून या ठिकाणी रुग्णांना तसेच त्यांच्या नातेवाईकांना मोफत मार्गदर्शन केले जाते. ठाणे शहरातील आधाररेखा प्रतिष्ठान मागील ११ वर्षे कर्करुग्ण आणि त्यांच्या नातेवाईकांचे समुपदेशन, तसेच त्यांना मार्गदर्शन करण्यासाठी कार्यरत आहे. ठाण्यातील रश्मी जोशी यांचे पती अरविंद जोशी हे कर्करोगग्रस्त होते. त्यामुळे कर्करुग्ण आणि त्यांचे कुटुंबीय यांच्या अडचणी, वेदना त्यांनी जवळून अनुभवल्या आहेत. हा त्रास इतर रुग्णांना आणि त्याच्या नातेवाईकांना होऊ नये, यासाठी जोशी दाम्पत्याने २०१३ मध्ये आधाररेखा प्रतिष्ठानची स्थापना केली.