डहाणू, ता. २१ (बातमीदार) : १ जूनपासून पावसाळ्यात मासेमारीवर बंदी असल्याने या काळात सुक्या आणि खारवलेल्या मासळीला मोठी मागणी असते. सद्यस्थितीत मात्र सुक्या मासळीची टंचाई असल्याने मोठ्या प्रमाणावर भाव वाढू लागले आहेत. तरीदेखील ती मिळेनाशी झाल्याने खरेदी करण्यासाठी लोकांनी गुजरातमधील शनिवारी भरणाऱ्या खत्तलवाडच्या आठवडा बाजाराकडे धाव घेतली आहे.
यावर्षी सुक्या आणि खारवलेल्या मासळीची टंचाई असल्याने कोळंबीच्या सोड्याचे दर हजार ते बाराशे रुपयांपर्यंत पोहोचले आहेत. तरीदेखील ही मासळी बाजारात कमी प्रमाणात उपलब्ध आहे. त्याचबरोबर सुके बोंबील, सुकट आणि करंदी, मांदेळी या मासळीचे भावही प्रचंड वाढले आहे. त्यांचे दर किलोला पाचशे ते सहाशे रुपयांपर्यंत पोहोचले आहेत. सुकी मासळी ही पावसाळ्यात मिळत नसल्याने हिवाळ्यात आणि उन्हाळ्यात सुकवलेला मासळीचा वापर केला जातो. सध्या समुद्रातील माशांचे प्रमाण अतिशय कमी झाले आहे. जाळ्यात मासे कमी प्रमाणात सापडत आहेत. बोंबील, करंदी, मांदेळी, सुकट यांसारखे लहान मासे जाळ्यात सापडताच त्यांना सुकवण्याचे काम मच्छीमारांनी सुरुवात केले आहे. मात्र, हे मासे सुकविण्यासाठी लागणारी जागाच मिळत नसल्याने मच्छीमारांना मासळी सुकवणे कठीण झाले आहे. परिणामी, सुक्या मासळीचे प्रमाण कमी झाले आहे. सुक्या माशांचा दुष्काळ निर्माण झाला आहे. म्हणून पावसाळ्याची बेगमी करण्यासाठी येथील लोक रविवारी भरणाऱ्या वाणगाव आणि सोमवारी भरणाऱ्या डहाणू व गुजरातमधील खत्तलवाड या आठवडा बाजाराकडे वळले आहेत.
पावसाळ्यासाठी सुक्या मासळीची साठवणूक करून ठेवावी लागते. त्यामुळे बंदर ठिकाणच्या मासेमारी करणाऱ्या गावांतून बोंबील, सुकट, करंदी, मांदेळी यांसारखे लहान मासे खरेदी करावे लागतात. मासळी बाजारात मात्र अल्प प्रमाणात हे सुके मासे मिळत असल्याने त्याचे दर वाढले आहेत. काही वेळा सुक्या मासळींच्या तुटवड्यांमुळे हे मासे खरेदी करण्यासाठी गुजरातमधील खत्तलवाड येथे जावे लागते.
- सुरेश करबट, नागरिक
सुक्या माशांचे दर (रुपयांत)
बोंबील (किलो) ५००
मांदळी (किलो) २००
करंदी (किलो) ३००
सोडे (किलो) १३oo
सुकट (१०० नग) ३५०
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
