अतिधोकादायक रासायनिक कंपन्यांचे कायमस्वरूपी स्थलांतर

सकाळ वृत्तसेवा
डोंबिवली, ता. २३ ः एमआयडीसीतील अतिधोकादायक रासायनिक कंपन्यांचे कायमस्वरूपी स्थलांतर करण्यात येणार आहे. याबाबत मुख्यमंत्री एकनाथ शिंदे आणि उद्योगमंत्री उदय सामंत यांच्याशी चर्चा झाल्याची माहिती खासदार डॉ. श्रीकांत शिंदे यांनी दिली.
डोंबिवली एमआयडीसीतील अमुदान रासायनिक कंपनीत गुरुवारी दुपारी झालेल्या स्फोटाची माहिती मिळताच उद्योगमंत्री उदय सामंत, कल्याण लोकसभेचे खासदार डॉ. श्रीकांत शिंदे, आमदार राजू पाटील, निरंजन डावखरे, शिवसेना सचिव भाऊ चौधरी, ठाणे जिल्हाधिकारी अशोक शिनगारे, डोंबिवली शहरप्रमुख राजेश मोरे यांनी घटनास्थळी पाहणी केली. या स्फोटात जखमींवर खासगी आणि सरकारी रुग्णालयांमध्ये उपचार सुरू आहेत. खासदार शिंदे यांनी जखमींची भेट घेऊन त्यांच्या कुटुंबीयांना धीर दिला. तसेच स्फोटातील जखमींच्या उपचारांची जबाबदारी घेत स्फोटामुळे नुकसान झालेल्या रहिवाशांना पंचनामा करून आठवडाभरात नुकसानभरपाईचे निर्देश मुख्यमंत्र्यांनी ठाणे जिल्हाधिकाऱ्यांना दिल्याचे सांगितले. तसेच, डोंबिवली एमआयडीसीत वारंवार होणाऱ्या दुर्घटनांमुळे रहिवासी भागाला निर्माण झालेला धोका लक्षात घेता रासायनिक कंपन्यांचे वर्गीकरण करून अतिधोकादायक कंपन्यांचे शहराबाहेर कायमस्वरूपी स्थलांतर केले जाणार असून याबाबत मुख्यमंत्री एकनाथ शिंदे आणि उद्योगमंत्री उदय सामंत यांच्याशी चर्चा झाल्याचे यावेळी शिंदे यांनी सांगितले.