निर्माल्य कलश परिसरात ढिगारे

निर्माल्य कलश परिसरात ढिगारे;
गोराईत येणाऱ्या पर्यटकांमध्ये नाराजी
कांदिवली, ता. २८ (बातमीदार) ः बोरिवली पश्चिमेतील गोराई फेरी बोटीकडे जाणाऱ्या मार्गावर निर्माल्य कलशाच्या आसपास कचऱ्याचे ढिगारे साचले असून दुर्गंधी पसरली आहे. या कचऱ्यामध्ये देव्हारे, देवतांचे फोटो पाहून पर्यटकांमध्ये नाराजी पसरली आहे.
पालिकेने या ठिकाणी नियमित स्‍वच्छता करावी, अशी मागणी पर्यटकांनी केली आहे. गोराई बीच, ग्लोबल विपश्यना पॅगोडा, एस्सेल वर्ल्ड या ठिकाणी जाण्यासाठी रविवारी (ता. २६) पर्यटकांनी प्रचंड गर्दी केली होती. गोराई खाडीवर फेरी बोटीकडे जाणाऱ्या मार्गाच्या प्रवेशद्वाराच्या बाजूलाच दोन निर्माल्य कलश पालिकेने ठेवले आहेत. मात्र, वेळेत कचरा उचलला जात नसल्‍याने इथे नेहमीच ढिगारे साचलेले असतात. निर्माल्य कलशामध्ये कचरा टाका, अन्यथा २०० ते एक हजार रुपये दंड भरावा लागेल, असा फलक पर्यटकांचे लक्ष वेधून घेत होता. मात्र, निर्माल्‍य कलशच कचऱ्यात सापडल्‍याने कचरा टाकायचा कुठे, असा प्रश्‍न पर्यटकांना पडला होता. कलशाची वेळीच साफसफाई होत नाही, पालिका वेळेवर कचरा उचलत नाही, त्‍यामुळे अधिकाऱ्यांवर कारवाई करणार का, असा प्रश्‍न विचारला जात आहे.

या परिसरात दररोज हजारो पर्यटक येतात. अशा मार्गांवर सुशोभीकरण, पर्यटकांना आकर्षित करणारी सजावट करणे गरजेचे आहे.
-सोनल वाघ, पर्यटक