मतमोजणीमुळे कासा बाजारपेठ सामसूम

कासा, ता. ४ (बातमीदार) : लोकसभा निवडणुकीचे निकाल जाहीर होत असताना कासा बाजारपेठेत सामसूम पाहायला मिळाली.

गेल्या काही दिवसांपासून कासा बाजारपेठेत दररोज कृषी केंद्रांवर भात, खत खरेदीसाठी शेतकऱ्यांशी मोठी गर्दी होत होती; पण आज सकाळपासूनच फक्त कृषीविषयक बी-बियाण्यांची माहिती देणारे स्वयंसेवक फक्त दिसत होते. दररोज गर्दी होणाऱ्या वडापाव केंद्रावर सामसूम पाहायला मिळाली. ज्या बँकांमध्ये दररोज नागरिक पैसे देवाण-घेवाण करण्यासाठी गर्दी करत होते, त्यादेखील आज रिकाम्या दिसत होत्या. त्याचबरोबर दररोज गुळाचा चहा पिण्यासाठी मोठी गर्दी करणाऱ्या चहाच्या दुकानांतदेखील आज सकाळपासून सामसूम पाहायला मिळाली.

अनेक नागरिक मोबाईलवर निवडणूक निकाल पाहण्यात मग्न होते. पालघर लोकसभा निवडणूक कोण जिंकते, त्याचबरोबर महाराष्ट्रात महाविकास आघाडी की महायुती कोणाच्या जागा जास्त येतात, तसेच या निवडणुकीत नरेंद्र मोदी पुन्हा आपली सत्ता राखतात की इंडिया आघाडीकडे सत्ता जाते, या उत्सुकतेने अनेक नागरिक आज घराबाहेर पडले नव्हते.

अनेक नागरिकांनी या निवडणुकीत उत्सुकता दाखवली होती. सर्वसाधारणपणे मतदानानंतर नागरिक आपल्या कामात व्यग्र असतात; पण यावर्षी निवडणुकीच्या निकालाकडे टपरीवाल्यांपासून अनेक व्यापारी वर्ग, तसेच सर्वसाधारण नागरिकांचेदेखील लक्ष होते.