ठाकरेंना संपवण्याच्या प्रयत्नात भाजपला फटका

सकाळ वृत्तसेवा
ठाणे, ता. ५ : शिवसेना संपवण्यासाठी भाजपने शिंदे गटाला ताकद दिली, मात्र जिथे काँग्रेसविरोधात भाजपचे उमेदवार उभे होते, तिथे शिवसैनिकांनी भाजपचा सुपडा साफ केला. ठाकरेंना संपवण्याच्या प्रयत्नात महाराष्ट्रात भाजप संपली अशी टीका ठाकरे गटाचे जिल्हाप्रमुख केदार दिघे यांनी केली आहे.

ठाण्यातील शिंदे गटाचा विजय हा धनशक्ती आणि भाजपच्या मोदी मतांवर मिळालेला आहे. शिवसेनेचे राजन विचारे हे एकाकी या धनशक्ती विरोधात लढले. उद्धव ठाकरे यांना नामोहरम करण्यासाठी भाजपने शिंदेंच्या पाठीमागे आपली सगळी ताकद उभी केली, मात्र भाजपच्या उमेदवारांना शिवसैनिकांनी नाकारले आणि काँग्रेसचे उमेदवार विजयी झाले. मुलुंडमध्ये भाजपच्या उमेदवाराचा शिवसैनिकांनी पराभव करत शिवसेनेचे उमेदवार संजय दिना पाटील यांना दणदणीत विजय मिळाला. त्यामुळे शिंदेंची ताकद भाजपच्या कामाला आली नाही. याचा दुसरा अर्थ शिंदेंची ताकद नाही, असाही होतो. महाराष्ट्रात शिंदेंचा कुठेही फायदा भाजपला झालेला दिसला नाही. उलट भाजपच्या जीवावर शिंदेंचे काही उमेदवार निवडून आले, असेही केदार दिघे यांनी म्हटले. तसेच पक्ष आणि चिन्ह चोरला असतानाही शून्यातून विश्व निर्माण करत नऊ जागांवर दणदणीत विजय संपादित केल्याबद्दल केदार दिघे यांनी शिवसेना पक्षप्रमुख उद्धव ठाकरे यांचे अभिनंदन केले आहे.