पामबीच मार्गावर अपघातात एकाचा मृत्यू

पामबीच मार्गावर अपघातात एकाचा मृत्यू
दोघे गंभीर जखमी

नवी मुंबई, ता. ६ (वार्ताहर) : उलवे येथून पामबीच मार्गे वाशीच्या दिशेने जाणाऱ्या भरधाव वेगातील कारवरील चालकाचे नियंत्रण सुटल्याने कार दुभाजकावर चढून झाडांवर धडकल्याने झालेल्या अपघातात कारमधील एकाचा मृत्यू झाला, तर चालक व त्याचा सहकारी गंभीर जखमी झाला आहे. ही घटना आज पहाटे सीवूड्स येथे घडली.
अपघातात गंभीर जखमी झालेल्या दोघांवर वाशीतील रुग्णालयात उपचार सुरू आहेत. एनआरआय पोलिसांनी या अपघातानंतर कार चालकाविरोधात निष्काळजीपणाचा गुन्हा दाखल केला आहे. या अपघातात मृत झालेल्याचे नाव राहुल हणमंत पवार (वय ३२, रा. उलवे) असे आहे. गंभीर जखमी झालेल्या कारचालकाचे नाव करण रवींद्र घरत (वय २३, रा. शेलघर) व अन्य एकाचे सुशांत नारायण ठाकूर (वय ३२, रा. न्हावा गाव) असे आहे. हे तिघेही गुरुवारी पहाटे ४ वाजण्याच्या सुमारास उलवे येथून पामबीच मार्गे वाशीच्या दिशेने जात होते. करण घरत हा कार चालवत होता, तसेच त्याच्या बाजूला सुशांत ठाकूर बसला होता; तर पाठीमागे राहुल पवार बसला होता. पामबीच मार्गावरून हे तिघेही कारमधून भरधाव वेगात वाशीच्या दिशेने जात असताना, सीवूड्स येथील टी. एस. चाणक्य मरिन ॲकॅडमीजवळ हा अपघात घडला. अपघातात कारमध्ये पाठीमागे बसलेला राहुल पवार याचा जागीच मृत्यू झाला, तर करण आणि सुशांत हे दोघे गंभीर जखमी झाले.