पालिकेचे अधिकारी-कर्मचाऱ्यांची निवडणूक कामातून कार्यमुक्तता

पालिकेच्या अधिकारी-कर्मचाऱ्यांची निवडणूक कामातून कार्यमुक्तता
सकाळ वृत्तसेवा
मुंबई, ता. ८ : लोकसभा सार्वत्रिक निवडणूक २०२४ करिता मुंबई महापालिकेचे अधिकारी, कर्मचारी यांच्या सेवा घेतल्या होत्या. या कर्मचाऱ्यांना निवडणूक आयोगाने कार्यमुक्त केले आहे. लोकसभा सार्वत्रिक निवडणुकीसाठी मुंबई महापालिकेतील अत्यावश्यक, आपत्कालीन विभाग सोडून उर्वरित विभागातील कर्मचाऱ्यांच्या सेवा निवडणुकीच्या कामाकरिता देण्याबाबत आयोगाकडून विनंती करण्यात आली होती. त्यानुसार ही सेवा देण्यात आली.

यामध्ये घनकचरा व्यवस्थापनातील प्रमुख अभियंता, पर्जन्य जलवाहिन्या, पाणीपुरवठा प्रकल्प, मलनिस्सारण प्रचालन आणि प्रकल्प, रस्ते आणि वाहतूक अशा विभागांतील अधिकारी कर्मचाऱ्यांच्या सेवा निवडणूक कामाकरिता घेण्यात आल्या नसल्याचेही आयोगाने वेळोवेळी स्पष्ट केले आहे. मुंबई शहरातील मतदान २० मे रोजी पार पडले. मतदान प्रक्रियेत सहभागी असलेल्या कर्मचाऱ्यांना दुसऱ्या दिवशी तातडीने कार्यमुक्त करण्यात आले. मतमोजणी प्रक्रिया ४ जून रोजी पूर्ण झाली. त्यानंतर उर्वरित विधानसभा मतदारसंघ कार्यालयाअंतर्गत पालिकेच्या कर्मचाऱ्यांच्या सेवा अधिग्रहित केलेल्या कर्मचाऱ्यांना कार्यमुक्त करून कार्यालयात अहवाल सादर करावा, असे आदेश जिल्हाधिकारी संजय यादव यांनी काढले होते. त्यानुसार अहवालही प्राप्त झाले आहेत, अशी माहिती जिल्हाधिकारी कार्यालय निवडणूक शाखा आणि मनुष्यबळ व्यवस्था मुंबई शहर यांनी कळविले आहे.

..
काही कर्मचारी काही अंशी निवडणूक प्रक्रियेत
शिक्षक व पदवीधर मतदारसंघाच्या निवडणुकीच्या कार्यक्रम घोषित झाला असून ही निवडणूक २६ जून २०२४ रोजी घेण्यात येणार आहे. या कामासाठी काही अंशी कमी कर्मचारी या निवडणूक प्रक्रियेत आहेत. ते पूर्ण वेळ नाहीत. आपल्या मूळ कार्यालयाचे कामकाज सांभाळून आठवड्यातील फक्त दोन दिवस काही वेळ निवडणूक कामकाजावर आहेत. यामध्ये आपत्कालीन आणि अत्यावश्यक सेवा सोडून इतर विभागांचा समावेश आहे, अशी माहिती आयोगाने दिली आहे.