दिव्यांगांना पेन्शनची प्रतीक्षा

भाईंदर, ता. १० (बातमीदार) : शहरात राहणाऱ्या दिव्यांग व्यक्तींना महापालिकेकडून दरवर्षी वार्षिक पेन्शन दिली जाते. त्याचा दिव्यांगांना मोठा आधार असतो. दरवर्षी एप्रिलमध्ये पेन्शनचे वाटप सुरू होते, मात्र यावर्षी निवडणुकीची आचारसंहिता लांबल्याने दिव्यांग पेन्शनची प्रतीक्षा करत आहेत.
अर्थसंकल्पाच्या पाच टक्के रक्कम महापालिकेकडून दिव्यांगांसाठी राखीव ठेवली जाते. त्यातून दिव्यांगांना आवश्यक असलेले साहित्य, स्टॉल आदी सुविधांसोबत वार्षिक पेन्शनची सुविधाही दिली जाते. दिव्यांग किती प्रमाणात दिव्यांग आहेत, त्यानुसार त्यांना वार्षिक १० हजार, १३ हजार आणि १५ हजार रुपये पेन्शन दिली जाते. शहरात सुमारे दोन हजारांहून अधिक दिव्यांग आहेत. गेल्यावर्षी १,४०० दिव्यांगांना पेन्शन देण्यात आली होती. नवीन आर्थिक वर्ष सुरू झाल्यानंतर एप्रिलपासून पेन्शनचे वाटप सुरू होणे अपेक्षित होते, मात्र लोकसभेची आचारसंहिता सुरू झाल्यामुळे हे वाटप लांबणीवर पडले. लोकसभा निवडणुकीचे निकाल घोषित झाल्यानंतर वाटप सुरू करायचे प्रशासनाने नक्की केले होते. त्यानुसार दिव्यांगांना पेन्शनसाठी १० जूनला अर्ज करण्यास सांगण्यात आले होते. त्यामुळे सोमवारपासून दिव्यांग महापालिका कार्यालयात यायला सुरुवात झाली, परंतु त्यांचे अर्ज स्वीकारता येणार नाहीत, असे उत्तर कर्मचाऱ्यांकडून देण्यात आले. त्यामुळे त्यांच्यात नाराजी निर्माण झाली.
लोकसभेची आचारसंहिता संपुष्टात येताच कोकण पदवीधर मतदारसंघाची आचारसंहिता लागू झाली आहे. त्यामुळे पुन्हा एकदा पेन्शन वाटप करणे प्रशासनाला अशक्य झाले आहे. आता पदवीधर मतदारसंघ निवडणुकीची आचारसंहिता संपल्यानंतर १० जुलैला अर्ज करण्यास दिव्यांगांना सांगण्यात आले, अशी माहिती महापालिकेच्या समाजविकास विभागाकडून माहिती देण्यात आली. निव्वळ निवडणूक आचारसंहितेमुळे दिव्यांग गेल्या तीन महिन्यांपासून पेन्शनपासून वंचित राहिले आहेत.