आजार नियंत्रणासाठी जनावरांचे लसीकरण

अलिबाग, ता. १ (बातमीदार) ः घटसर्प, फऱ्या, लंपीसारख्या आजारांवर नियंत्रण ठेवण्यासाठी पशुसंवर्धन विभागामार्फत जनावरांचे लसीकरण सुरू करण्यात आले आहे. आतापर्यंत एक लाख ८५ हजार ६०० जनावरांना लस देण्यात आली आहे. गाय, म्हैस, बैल आदी पाळीव जनावरांच्या आरोग्याच्या दृष्टीने पावले उचलण्यात आल्याची माहिती पशुसंवर्धन विभागाने दिली आहे.
जिल्ह्यात पावसाचे प्रमाण जास्‍त आहे. यादरम्‍यान जनावरांना फऱ्या, लंपी, घटसर्पसारखे आजार होण्याची भिती असते. ताप, येणे, अंगावर फोड येणे, घसा दुखणे अशा अनेक प्रकारचा त्रास होतो. कित्येक वेळा दुधाळ जनावरांच्या दुधाचे प्रमाण कमी होणे, गर्भपात होणे, अशक्‍तपणा येणे आदी समस्या निर्माण होतात. परिणामी पशुधन घटण्याचाही धोका असतो. पावसाळ्यात पशुधनाच्या सुरक्षेसाठी पशुसंवर्धन विभाग कामाला लागले आहे.
जिल्ह्यात घटसर्प आजारावर ४४ हजार लसीचा पुरवठा झाला असून ४२ हजार ७६५ लशी जनावरांना देण्यात आल्या आहेत. या आजारावरील ९८ टक्के लसीकरण पूर्ण झाले आहे. फऱ्या व घटसर्प आजारावर नियंत्रण ठेवण्यासाठी १८ हजार लशी प्राप्त झाल्या असून १७ हजार ९९७ लशी देण्यात आल्या आहेत. या आजारावरील ९६ टक्के लसीकरण पूर्ण झाले आहे. तसेच लंपीसाठी एक लाख ४१ हजार लशींपैकी एक लाख २४ हजार ८३८ जनावरांचे लसीकरण झाले आहे.

तालुक्यात १२ हजार जनावरांचे लसीकरण
अलिबाग तालुक्यात घटसर्प फऱ्या, आंत्रविषार व लंपी आजारावरील लसीकरणाचे काम तालुका पशुसंवर्धन अधिकारी डॉ. राजेश लाळगे यांच्या मार्गदर्शनाखाली सुरू आहे. १२ हजार ३४० लसींचा पुरवठा अलिबाग तालुक्याला झाला असून १२ हजार ९० जनावरांचे लसीकरण पूर्ण झाले असल्याची माहिती तालुका पशुसंवर्धन विभागाकडून देण्यात आली आहे.