नेरळ पोलिसांकडून दोन गुन्हे उघड

नेरळ, ता. २ (बातमीदार) ः दोन वेगवेगळ्या गुन्ह्याचा तपास करत त्यातील चार आरोपींना मुद्देमालासह पकडण्यात नेरळ पोलिसांना यश आले आहे.
मौजे माले गावात राहणारे गोपाळ लक्ष्मण वेहेले यांनी त्यांच्या घरामागे मोकळ्या जागेत चरण्यासाठी सोडलेले ३ बैल २६ मे रोजी चोरट्यांनी पळवले. याप्रकरणी नेरळ पोलिस ठाण्यात तक्रार दाखल करण्यात आली होती. त्‍यानुसार नेरळ पोलिस ठाण्याचे प्रभारी अधिकारी शिवाजी ढवळे यांनी गुन्ह्याचा उलगडा करण्यासाठी तपास पथक नियुक्त केले. पथकाने तांत्रिक पुराव्याच्या आधारे आरोपींनी ३ गुरे भरून नेण्याकरिता स्कॉर्पिओ गाडी वापरल्‍याचे माहिती समोर आली. त्‍यानंतर साहिल नावेद शेख, इम्तियाज महम्मद इलियास शेख, अकबर जाबाज शेख (सर्व रा. रेतीबंदर रोड, कल्‍याण) यांना वाजता अटक केली. तसेच गुन्हा करण्याकरीता वापरलेली कारही हस्तगत केली.
दुसऱ्या एका प्रकारणात नेरळ निर्माण नगरी सोसायटीच्या मोकळ्या जागेतून चिराग रामचंद्र धुळे यांची दुचाकी चोरी झाली होती. नेरळ पोलिस ठाण्याच्या तपास पथकाने सूत्रांच्या मदतीने गुन्हा उघडकीस आणला. गुन्ह्यात आरोपी सचिन सुनील सोनावणे (३२, कुलाबा) याला अटक करण्यात आली. आरोपीने नेरळमधून चोरलेली तसेच पनवेल, कामोठे, नेरूळ पोलिस ठाण्याच्या हद्दीतून चोरलेल्या अशा एकूण ५ दुचाकी हस्तगत करण्यात आल्‍या आहेत. आरोपी सध्या पोलिस कोठडीत असून नेरळ पोलिस याप्रकरणी अधिक तपास करीत आहेत.
पोलिस अधीक्षक सोमनाथ घार्गे, अप्पर अधीक्षक अतुल झेंडे, कर्जतचे उपविभागीय अधिकारी डी.डी. टेळे यांचे मार्गदर्शनाखाली नेरळ पोलिस ठाण्याचे प्रभारी अधिकारी सहायक निरीक्षक शिवाजी ढवळे, उपनिरीक्षक लिंगप्पा सरगर, समीर लोंढे, सहायक फौजदार श्रीरंग किसवे, हवालदार प्रवीण लोखंडे आदींनी महत्त्वाची कामगिरी बजावली.