नवरात्रीचा पूर्णाहुतीचे हवन

मुंबई, ता. ४ ः श्री मुंबादेवी मंदिरात दोन वर्षांतून एकदा शतचंडी यज्ञ केला जातो. तसेच, चार नवरात्र उत्सव साजरे केले जातात. यामध्ये माघी नवरात्री, चैत्र नवरात्र, आषाढ नवरात्र आणि आश्विन म्हणजेच शारदीय नवरात्रोत्सव यांचा समावेश असतो. शनिवारपासून (ता. ६) आषाढ नवरात्र सुरू होत असून, त्यानिमित्त १५ जुलै रोजी नवरात्रीच्या पूर्णाहुतीचे हवन मंदिरात होणार आहे. या काळात सात दिवसांचा शतचंडी महायज्ञही होणार आहे. रोज सकाळी सात ते दुपारी बारापर्यंत नवचंडी पाठ तसेच देवीचे विशेष पूजन केले जाणार आहे. महायज्ञाचा पूर्णाहुती सोहळा १२ जुलै रोजी दुपारी बारा वाजता होणार आहे. त्यानंतर महाआरती होईल. आषाढ नवरात्री उत्सवातील महायज्ञातून देवी-देवतांना मुंबई आणि आजूबाजूच्या शहरांमधील पाणीटंचाईची परिस्थिती दूर करावी, ही प्रार्थना केली जाणार असल्याची माहिती मुंबादेवी मंदिराचे व्यवस्थापक हेमंत जाधव यांनी दिली.