शिवसेना उपतालुकाप्रमुख विनायक भोसले विरोधात ‘ॲट्रॉसिटी`चा गुन्हा दाखल

शिवसेनेचे विनायक भोसले यांच्याविरोधात ‘ॲट्रॉसिटी’चा गुन्हा

विरार, ता. ५ (बातमीदार) : राजकीय वैमनस्यातून जातीवाचक टिप्पणी करत पूर्व सहकाऱ्याची मद्यधुंद अवस्थेतील चित्रफीत समाजमाध्यमांवर प्रसारित केल्याप्रकरणी शिवसेनेचे (शिंदे गट) वसई उपतालुकाप्रमुख विनायक भोसले यांच्याविरोधात नालासोपारा-तुळिंज पोलिस ठाण्यात ॲट्रॉसिटीचा गुन्हा दाखल करण्यात आला आहे.
प्रवीण सदानंद जाधव (वय ३६) यांच्या तक्रारीनंतर पोलिसांनी हा गुन्हा दाखल केला आहे. जाधव हे विनायक भोसले यांचे पूर्वसहकारी आहेत. भविष्यात बदनामी करण्याच्या उद्देशाने गेल्या वर्षी जाधव यांची मद्यधुंद अवस्थेतील चित्रफीत मित्रांकरवी विनायक भोसले यांनी बनवली होती. ती २५ जून रोजी एका व्हॉट्सॲप ग्रुपवर प्रसारित करून जाधव यांच्याविषयी भोसले यांनी राजकीय व जातीवाचक टिप्पणी केली होती. याप्रकरणी विनायक भोसले यांच्याविरोधात गुरुवारी (ता. २५) रात्री गुन्हा दाखल करण्यात आला आहे.