८० वर्ष जुन्या इमारतीचा भाग कोसळला

८० वर्षे जुन्या इमारतीचा भाग कोसळला
सकाळ वृत्तसेवा
ठाणे, ता. ८ : जांभळीनाका बाजारपेठेतील ८० ते ९० वर्षे जुन्या इमारतीचा भाग रविवारी (ता. ७) कोसळला. जांभळीनाका येथील कडवा गल्ली परिसरात ८० ते ९० वर्षे जुनी अतिधोकादायक दुमजली इमारत आहे. या इमारतीत कोणीही वास्तव्याला नव्हते. रविवारी सकाळी १०.३० वाजताच्या सुमारास इमारतीचा जीर्ण झालेला भाग अचानक कोसळला. घटनेची माहिती ठाणे महापालिकेला मिळाल्यानंतर आपत्ती व्यवस्थापन विभागाचे पथक घटनास्थळी दाखल झाले. सुरक्षेच्या कारणास्तव पथकांनी येथे धोकापट्टी बांधली आहे.