मुसळधार पावसामुळे कार्यालये सुनी सुनी

मुसळधार पावसामुळे कार्यालये सुनीसुनी
रेल्वे-रस्ता बंदचा फटका, ३० टक्के कर्मचाऱ्यांची उपस्थिती

सकाळ वृत्तसेवा
मुंबादेवी, ता. ८ (बातमीदार) : पावसाच्या संततधारेमुळे उपगरातून मुंबईकडे येणाऱ्या रेल्वे मार्ग तसेच रस्ता मार्गांवर पाणी साचल्यामुळे सोमवारी (ता. ८) सकाळपासूनच वाहतूक व्यवस्था कोलमडली होती. रेल्वे रुळावर पाणी भरल्याने आणि मार्ग दिसण्यास समस्या येत असल्याने रेल्वेगाड्या बंद ठेवण्यात आल्या होत्या. पनवेल ते छत्रपती शिवाजी महाराज टर्मिनसकडे अप-डाऊन लोकल खोळंबल्या होत्या, तर कुर्ला, चेंबूर, हिंदमाता, लालबाग आणि परळच्या काही भागातही पाणी साचल्याने नागरिकांची तारांबळ उडाली होती.
ठाणे, कल्याण, अंबरनाथ, टिटवाळा, बदलापूर, कसारा आणि कर्जतकडून मुंबईनगरीत दररोज येणाऱ्या चाकरमानी, व्यापारी आणि छोट्या-मोठ्या व्यावसायिक, उद्योजकांना आपले आजचे व्यवहार ठप्प ठेवावे लागले.
दक्षिण मुंबईतील पालिका विभाग कार्यालये, बँक, विमा, महामंडळे आणि खासगी आस्थापनांमध्येही अधिकारी आणि कर्मचारीवर्गाची उपस्थिती अवघी ३० ते ३५ टक्के असल्याचे दिसून आले.
बी विभागात कार्यरत असणारे सुरक्षारक्षक प्रदीप कुंभार यांना त्यांच्या उलवा (बेलापूर) घरापासून बी विभाग, डोंगरी येथे येण्यासाठी पावसामुळे चार तास लागल्याचे त्यांनी सांगितले.
जेजे, भेंडीबाजार, मुसाफिर खाना, क्रॉफर्ड मार्केट, मनीष मार्केट, डोंगरी, चारनळ, नळ बाजार, भुलेश्वर, चिरा बाजार, कुंभारवाडा स्टील मार्केट, मेट्रो सिनेमा परिसरात ग्राहकसंख्या रोडावल्याने व्यावसायिकांना मोठा फटका बसला आहे. तर आजच्या पावसामुळे मराठी आणि इंग्रजी माध्यमांच्या शाळांना दुपारनंतर सुट्टी देण्यात आली.
पालिका कार्यालयातील कर्मचारीवर्गाच्या अनुपस्थितीमुळे आरोग्य विभागात जन्म, मृत्यू दाखला आणि विवाह नोंदणी प्रमाणपत्र काढण्यासाठी आलेल्यांनाही मागे फिरावे लागले.
भुलेश्वर काशी मंदिर, मुंबादेवी मंदिर, बाबुलनाथ शिवमंदिर आणि महालक्ष्मी मंदिरात पावसामुळे भाविकांची गर्दी नसल्याने देवदर्शनाला आलेल्या भाविकांना अगदी शांतपणे देवीचे दर्शन घेता आले.