लाच घेताना दोघांना अटक

कल्याण, ता. ९ (वार्ताहर) : औषध विक्रीच्या दुकानाचा परवाना मंजूर करण्यासाठी ७० हजारांची लाच घेताना ठाणे अन्न आणि औषध प्रशासनाच्या औषध निरीक्षकासह अन्य एकाला नवी मुंबई लाचलुचपत प्रतिबंधक विभागाने रंगेहाथ पकडले. कल्याण पश्चिमेतील डी-मार्टसमोर ही कारवाई करण्यात आली.
ठाणे अन्न आणि औषध विभागातील निरीक्षकपदावर काम करणारे संदीप नरवणे यांनी नवीन औषध विक्री दुकानाचा परवाना मंजूर करण्यासाठी शासकीय शुल्काव्यतिरिक्त स्वतःसाठी एक लाखांची मागणी संबंधित व्यावसायिकाकडे केली होती. मात्र, ७० हजारांत तडजोड करण्यात आली होती. याप्रकरणी नवी मुंबई लाचलुचपत विभागाकडे दाखल तक्रारीवरून कल्याण पश्चिमेत संदीप नरवणे याच्या उपस्थितीत तक्रारदाराकडून पैसे स्वीकारताना सुनील चौधरी याला पकडण्यात आले. त्यानंतर कल्याणमधील महात्मा फुले चौक पोलिस ठाण्यात दोघांवरही भ्रष्टाचार प्रतिबंधक अधिनियम सन १९८८ च्या कलम ७,७ (अ), १२ प्रमाणे गुन्हा दाखल करण्यात आला आहे.