दोन गुन्हेगार तडीपार

भाईंदर (बातमीदार) : मिरा-भाईंदरमधील दोन सराईत गुन्हेगारांना पोलिसांनी चार जिल्ह्यांतून तडीपार केले आहे. लारा पालनाथ नाडार आणि गणेश मोहन शेट्टी अशी त्यांची नावे आहेत. दोन्ही गुन्हेगारांना मिरा-भाईंदर परिमंडळ एकच्या पोलिसांनी गंभीर दुखापत करणे, गर्दी करून मारामारी करणे, दुखापत करून जबरी चोरी करणे यांसारख्या गंभीर स्वरूपाच्या गुन्ह्यात याआधीही अटक केली होती; मात्र त्यानंतरही त्यांच्या गुन्हेगारी स्वभावात बदल झाला नाही. २०२४ या वर्षात त्यांच्यावर खंडणी मागणे, महिला अत्याचार, अपंग व्यक्तीशी गैरवर्तन आदी दहा गंभीर गुन्हे दाखल झाले. त्यामुळे मिरा-भाईंदर वसई-विरार अतिरिक्त पोलिस आयुक्त श्रीकांत पाठक, तसेच परिमंडळ एकचे उपायुक्त प्रकाश गायकवाड यांनी दोन्ही गुन्हेगारांना ठाणे, पालघर, मुंबई, मुंबई उपनगर या जिल्ह्यातून दोन वर्षांसाठी तडीपार केले.