आरोपीस अटक

बिगारी कामगारावर हल्‍ला
अंधेरी, ता.२७ (बातमीदार) ः मिस्त्री कामाची बॅग चोरी केल्याच्या संशयावरून सोनू हरिश्‍चंद्र तिवारी या ३२ वर्षांच्या बिगारी कामगारावर हल्ला केल्याप्रकरणी एका वॉण्टेड आरोपीस कांदिवली पोलिसांनी अटक केली. मनोज शिवनाथ सरोज असे या ४५ वर्षांच्या आरोपीचे नाव असून हल्ल्यानंतर तो उत्तर प्रदेशात पळून गेला. त्याला पाच दिवसांनी अटक करण्यात पोलिसांना यश आले आहे. त्याला बोरिवलीतील स्‍थानिक न्यायालयाने २९ ऑगस्टपर्यंत पोलिस कोठडी सुनावली आहे. या वृत्ताला वरिष्ठ पोलिस निरीक्षक ज्ञानेश्‍वर गणोरे यांनी दुजोरा दिला आहे.
ही घटना सोमवारी (ता. १९) रात्री साडेबारा वाजता कांदिवलीतील एस. व्ही. रोड, पूर्विका शॉपीजवळील देना बँक सिग्नल फुटपाथवर घडली. सोनू हा बिगारी कामगार असून कांदिवली परिसरात राहतो. त्याचे घरात भांडण झाल्याने तो घर सोडून देना बँक सिग्नलजवळील फुटपाथवर राहत होता. तिथेच मनोज हादेखील राहतो. मनोज हा मिस्त्री काम करतो. त्याची मिस्त्री कामाची बॅग चोरीस गेली होती. ही बॅग सोनूने चोरी केल्याचा संशय व्यक्त करून त्याने त्याच्याशी वाद घालण्याचा प्रयत्न केला होता. या वेळी रागाच्या भरात त्याने सोनूवर हातोड्याने प्राणघातक हल्ला केला. त्यात त्याच्या डोक्याला आणि तोंडाला गंभीर दुखापत झाली होती.
रक्तबंबाळ झालेल्या सोनूला तिथेच टाकून तो पळून गेला होता. कांदिवली पोलिसांनी घटनास्थळी धाव घेत जखमी सोनूला शताब्दी हॉस्पिटलमध्ये दाखल केले. त्याची प्रकृती चिंताजनक असल्याने त्याला आयसीयूमध्ये दाखल करण्यात आले आहे. याप्रकरणी सोनूच्या जबाबावरून पोलिसांनी मनोजविरुद्ध हत्येच्या प्रयत्नाचा गुन्हा दाखल केला होता.
मनोज हा हल्ल्यानंतर त्याच्या उत्तर प्रदेशातील गावी पळून गेला होता. त्यामुळे त्याच्या अटकेसाठी सहपोलिस आयुक्त सत्यनारायण चौधरी, अतिरिक्त पोलिस आयुक्त राजीव जैन, पोलिस उपायुक्त आनंद भोईटे, सहाय्यक पोलिस आयुक्त शैलेंद्र धिवार, वरिष्ठ पोलिस निरीक्षक ज्ञानेश्‍वर गणोरे यांच्या मार्गदर्शनाखाली पोलिस निरीक्षक आनंद कांबळे, सहाय्यक पोलिस निरीक्षक हेमंत गिते, पोलिस उपनिरीक्षक दीपक पाटील, श्रीकांत मगर, नितीन साटम, मपोज गदळे आदींचे एक पथक उत्तर प्रदेशात पाठविण्यात आले होते. या पथकाने स्थानिक पोलिसांच्या मदतीने मनोज सरोजला त्याच्या उत्तर प्रदेशातील गावातून शिताफीने ताब्यात घेतले.