अल्पवयीन मुलीवर अत्याचार करण्याचा प्रयत्न

अल्पवयीन मुलीवर अत्याचार करण्याचा प्रयत्न

तारापूर, ता. २७ (बातमीदार) : येथील अल्पवयीन मुलीवर बलात्काराचा प्रयत्न आणि विनयभंगाची घटना ताजी असतानाच बोईसर पोलिस ठाण्याच्या हद्दीत एका अल्पवयीन मुलीचा विनयभंग करून तिच्यावर अनैसर्गिक अत्याचार करण्याचा प्रयत्न झाल्याची घटना उघडकीस आली आहे. याप्रकरणी आरोपीला पोलिसांनी अटक केली असून नागरिकांमधून संताप व्यक्त केला जात आहे.

बोईसर पोलिस ठाण्याच्या हद्दीतील झोपडपट्टी परिसरात सोमवारी (ता. २६) दुपारच्या सुमारास ही घटना घडली. यामध्ये एक नऊ वर्षीय अल्पवयीन मुलगी एका लहान मुलासोबत खेळत असताना आरोपी ४४ वर्षीय व्यक्तीने तिला दहा रुपयांचे प्रलोभन दाखवत एका बंद गाळ्यामध्ये नेत तिच्यावर अनैसर्गिक शारीरिक अत्याचार करण्याचा प्रयत्न केला. या वेळी पीडित मुलीने आरडाओरडा केल्याने जवळच कपडे धुवत असलेल्या तिच्या काकीने या गाळ्याकडे धाव घेतली. या वेळी एक व्यक्ती तिच्या अल्पवयीन पुतणीवर अनैसर्गिक अत्याचाराचा प्रयत्न करीत असल्याचे दिसून आले. या महिलेला बघताच आरोपीने घटनास्थळावरून जंगलाच्या दिशेने पळ काढला, मात्र महिलेने वेळीच आरडाओरडा केल्याने स्थानिकांनी आरोपीला पकडून ठेवत बोईसर पोलिसांच्या ताब्यात दिले. आरोपीविरोधात बोईसर पोलिस ठाण्यात गुन्हा दाखल करण्यात आला असून पोलिस निरीक्षक शिरीष पवार यांच्या मार्गदर्शनाखाली उपनिरीक्षक जितेंद्र अहीरराव या प्रकरणाचा अधिक तपास करीत आहेत.