दहीहंडी न फोडण्याचा ठाकरे गटाचा निर्णय

पालघर, ता. २७ (बातमीदार) : मालवण तालुक्यातील राजकोट किल्ल्यात उभारण्यात आलेल्या छत्रपती शिवाजी महाराजांचा पुतळा आठ महिन्यांत कोसळल्याने पालघर येथील ठाकरे गटाने या घटनेच्या निषेध नोंदवला. या वर्षी शहरातील हंडी न फोडण्याचा निर्णय घेतला. या प्रकरणी निषेध करून सरकारविरोधात घोषणा दिल्या.

पालघर शहरात अनेक वर्षांपासून दहीहंडी फोडण्याची परंपरा आहे. पालघरमधील सुमारे ४० ते ४५ हंडी फोडण्याच्या परंपरेला यावर्षी छेद देण्यात आला. फक्त पालघर येथील मानाची लक्ष्मीनारायण मंदिराची दहीहंडी फोडून अन्य दहीहंडी न फोडण्याचा त्यांनी निर्णय घेतला. त्यामुळे यावर्षी पालघर शहरात हौसेने हंडी लावणाऱ्यांचा हिरमोड झाला.

राजकोट किल्ल्यावरील शिवरायांचा पूर्णाकृती पुतळा कोसळल्यानंतर राज्यभरातील शिवप्रेमींमधून संताप व्यक्त होत आहे. लोकसभा निवडणुकीच्या वेळी महाराजांचा पुतळा उभारला, तर त्याचा फायदा होईल, या हेतूने त्याचे उद्‍घाटन करण्यात आले. ब्रांझचा पुतळा तयार करायचा असेल तर त्याला तीन वर्षे लागतात, मात्र हा पुतळा सहा महिन्यात बनवण्यात आला. त्याचे काम निकृष्ट दर्जाचे झाले. मात्र घाईघाईत उद्‍घाटन करून घेतल्याने हा प्रसंग ओढवला, असा दावा जिल्हाप्रमुख अजय ठाकूर यांनी केला. याप्रसंगी सुनील महेंद्रकर, यतीन उलकंदे, सिद्धेश घरत, जश्र्विन घरत, कृतार्थ पाटील व शिवसैनिक उपस्थित होते.