कल्याणमध्ये माजी आमदार शिंदे यांच्या औषध विक्री दुकानात चोरी

कल्याणमध्ये औषध विक्री दुकानात चोरी
सकाळ वृत्तसेवा
डोंबिवली, ता. २७ : कल्याण जिल्हा राष्ट्रवादी काँग्रेसचे जिल्हाध्यक्ष आणि अखिल भारतीय औषध विक्रेता संघटनेचे अध्यक्ष तथा माजी आमदार जगन्नाथ उर्फ आप्पा शिंदे यांच्या कल्याण पूर्व भागातील कोळसेवाडीमधील औषध दुकानात एका चोरट्याने शनिवार (ता. २४) मध्यरात्री चोरी केली आहे. याप्रकरणी दुकानाचा सुरक्षा रक्षक चेतन भारंबे (वय ३९) यांनी कोळसेवाडी पोलिस ठाण्यात तक्रार दिली आहे. त्यानुसार गुन्हा दाखल करण्यात आला आहे.
कोळसेवाडीमध्ये शिंदे आणि त्यांचे नातेवाईकांचे औषध विक्रीचे दुकान आहे. सकाळी ९ ते रात्री १० वाजेपर्यंत दुकान सुरू असते. शनिवारी रात्री दुकानातील कर्मचाऱ्यांनी दुकान बंद केले, मात्र दुकानाचा सुरक्षा रक्षक काही कारणास्तव त्या दिवशी रात्रपाळीसाठी दुकानावर सुरक्षा ठेवण्यासाठी आला नव्हता. याच संधीचा फायदा घेत चोरट्याने दुकानाचे शटर धारदार लोखंडी कटावणीने उघडले आणि ११ हजार रुपयांची रोख रक्कम घेऊन चोरटा पसार झाला.