राजावाडी रुग्णालयाचा दोन टप्प्यांत पुनर्विकास पालिकेने नेमले सल्लागार

सकाळ वृत्तसेवा
मुंबई, ता. ३० : कोविड काळात खाटा आणि उपकरणांच्या कमतरतेमुळे मुंबई महापालिकेच्या रुग्णालयांमधील आरोग्य सुविधांची कमतरता प्रकर्षाने समोर आली होती. याच अनुषंगाने पालिका प्रशासनाने रुग्णालयांच्या नूतनीकरणाबरोबर क्षमता वाढवण्यावर भर दिला आहे. घाटकोपर पश्चिमेकडील ६८ वर्षे जुन्या राजावाडी रुग्णालयाच्या पुनर्बांधणीसाठी महापालिकेने ब्ल्यू प्रिंट तयार केली असून पुनर्बांधणीसाठी ७०० कोटींचा खर्च अपेक्षित आहे.
मुंबईची लोकसंख्या वाढत असतानाही रुग्णालयांची क्षमता वाढवण्याकडे महापालिका प्रशासन फारसे लक्ष देत नव्हते, मात्र कोविड संकटानंतर हजारो कोटी खर्च करून महापालिका स्वतःच्या रुग्णालयांची स्थिती सुधारण्यास गती देत ​​आहे. नवीन रुग्णालये बांधण्याबरोबरच जुन्या रुग्णालयांची पुनर्बांधणी करून खाटा आणि उपकरणांची संख्या वाढवण्याचा प्रयत्न केला जात आहे. पूर्व उपनगरातील कुर्ल्यापासून मुलुंडपर्यंतच्या रहिवाशांना मुंबईतील सायन येथील लोकमान्य टिळक रुग्णालय आणि परळच्या केईएम रुग्णालयाकडे धाव घ्यावी लागते. त्यामुळे या रुग्णालयांची क्षमताही वाढवली जात आहे.
------------------------------------
सल्लागाराची नेमणूक
राजावाडीत येणाऱ्या रुग्णांची संख्या लक्षात घेता रुग्णालयाच्या विस्तारीकरणाची गरज लक्षात घेऊन पालिकेने ७०० कोटी रुपयांचे अंदाजपत्रक तयार केले आहे. यासाठी सल्लागाराची नियुक्ती करण्यात आली असून रुग्णालयाच्या इमारतीचा आराखडा, ब्ल्यू प्रिंट, जागेचे सर्वेक्षण, सध्याच्या इमारतीचे मोजमाप करून आराखडा तयार करणे, माती परीक्षण, खर्चाचा अंदाज घेणे, निविदा काढणे या कामांची जबाबदारी असेल. संरचना, अग्निशमन यंत्रणा समाविष्ट केली आहे. त्यासाठी महापालिका सल्लागाराला १४ कोटी रुपये देणार आहे.
------------------------------------------
पाच वर्षांत पुनर्बांधणी
राजावाडी रुग्णालयात सध्या सुरू असलेल्या कोणत्याही सुविधांवर परिणाम होणार नाही, याची खबरदारी घेताना टप्प्याटप्प्याने पुनर्बांधणी दोन टप्प्यात केली जाणार आहे. प्रत्येक टप्प्यासाठी अडीच वर्षांचा कालावधी निर्धारित आहे. पाच वर्षांत हे काम पूर्ण होईल, तसेच रुग्णालयाच्या पुनर्बांधणीसाठी पाच एफएसआय दिला जाणार असल्याने बांधकाम क्षेत्र १०४४४९.५९ चौरस मीटर इतके वाढणार आहे.
-------------------------------
खाटांची संख्या बाराशेवर
राजावाडी रुग्णालयातील रुग्णांची वाढती संख्या पाहता रुग्णालयाच्या विस्तारीकरणाची मागणी रुग्णालय प्रशासनाने केली होती. त्यांची मागणी लक्षात घेऊन रुग्णालयाची पुनर्बांधणी करण्याचा निर्णय घेण्यात आला आहे. सल्लागाराची नियुक्ती करण्यात आली आहे. निविदा प्रक्रिया पूर्ण झाल्यानंतर रुग्णालयाच्या पुनर्बांधणीला सुरुवात होईल. ही प्रक्रिया या वर्षअखेरीस पूर्ण होणे अपेक्षित आहे. तर खाटांची संख्या १२०० होईल.
------------------------------------------
राजावाडी रुग्णालयाची सध्याची क्षमता
खाटांची संख्या - ५००
ओपीडीमध्ये दररोज तीन हजार रुग्ण.
४०० रुग्ण उपचारासाठी दाखल.
रुग्णालयाचे क्षेत्रफळ १६८४३.९० चौरस मीटर.