मुलुंडमध्ये धारावीकरांच्या पुनर्वसनाला विरोध

मुलुंडमध्ये धारावीकरांच्या पुनर्वसनाला विरोध
चेंबूर, ता. ३ (बातमीदार) ः केंद्र सरकारने धारावीकरांचे मुलुंड परिसरातील मिठागर जमिनीवर पुनर्वसन करण्याचे धोरण निश्चित केले आहे. यासाठी सुमारे ५६ एकर जागा ताब्यात घेणार आहे; मात्र या केंद्र सरकारच्या धोरणाला मनसेने कडाडून विरोध केला असून मनसे कार्यकर्त्यांनी मुलुंड तहसीलदारांची भेट घेऊन याबाबत निवेदन दिले आहे.
मुलुंड येथील मिठागरे व डम्पिंग ग्राउंडच्या जागेवर धारावीकरांचे पुनर्वसन करण्याचे ठरविले आहे; मात्र सरकारच्या या निर्णयामुळे मोठा वाद निर्माण झाला आहे. मुलुंडकरांनी सरकारच्या धोरणाला विरोध केला आहे. मुलुंड परिसरातील तिवरांच्या जंगलात असंख्य दुर्मिळ जीवजंतूंच्या प्रजाती आहेत. या जंगलात दरवर्षी जगातील असंख्य फ्लेमिंगो पक्षी स्थलांतरित होत असताना या हजारो एकरच्या जागेवर धारावीकरांचे पुनर्वसन केले जाणार असल्याने पर्यावरण धोक्यात येणार आहे. त्यामुळे या जागेवर धारावीकरांचे पुनर्वसन करण्याला नागरिकांनी तीव्र विरोध केला आहे. कित्येक समस्यांचा मुलुंडकरांना सामना करावा लागणार असल्याने केंद्र सरकार व राज्य सरकारने योग्य निर्णय घेऊन धारावी प्रकल्पग्रस्तांचे धारावी परिसरातच पुनर्वसन करण्याची मागणी मनसेने केली आहे. शासनाने जबरदस्तीने धारावीकरांचे मुलुंड परिसरात पुनर्वसन केल्यास तीव्र आंदोलन करण्याचा इशारा मनसेने दिला आहे.