ट्रकच्या चाकाखाली क्लिनरचा मृत्यू

नवी मुंबई (वार्ताहर) : ट्रकच्या चाकाखाली आल्याने क्लिनरचा मृत्यू झाला आहे. एपीएमसीतील कांदा- बटाटा मार्केटमध्ये गुरुवारी सायंकाळी ही घटना घडली. आग्रा येथून बटाट्याने भरलेल्या ट्रकसोबत उत्तर प्रदेशातील सत्येंद्रकुमार कुशवाह (३०) हा एपीएमसीतील कांदा- बटाटा मार्केटमध्ये आला होता. सायंकाळी पावणेसहाच्या सुमारास ट्रकचालक लक्ष्मणसिंह रूपसिंह याने कोणी नसल्याच्या खात्रीशिवायच ट्रक मागे घेतला. यात ट्रकच्या पाठीमागे उभा असलेला क्लिनर सत्येंद्रकुमार हा चाकाखाली आल्याने त्याचा जागीच मृत्यू झाला. याप्रकरणी निष्काळजीपणाचा ठपका ठेवत पोलिसांनी ट्रकचालकाला ताब्यात घेतले आहे.