कल्याण-डोंबिवलीत दोन वेगवेगळ्या अपघातांत दोघे जखमी

दोन वेगवेगळ्या अपघातांत दोघे जखमी
सकाळ वृत्तसेवा
डोंबिवली, ता. ९ : कल्याण आणि डोंबिवलीत दोन वेगवेगळ्या अपघातांमध्ये दुचाकीने दिलेल्या धडकेत दोन जण गंभीर जखमी झाल्याची घटना घडली आहे. यात एक शाळकरी विद्यार्थिनी आणि एका दुचाकीस्वाराचा समावेश आहे.

पहिल्या घटनेत गार्गी मोहन सूर्यवंशी (वय १६) ही कल्याण पश्चिमेतील वाडेघर भागात राहणाऱ्या विद्यार्थिनीचा शाळा सुटल्यानंतर रस्ता ओलांडताना अपघात झाला. शिवाजी महाराज चौकाजवळ एका भरधाव मोटारीने तिला धडक दिली. ज्यात तिच्या डाव्या पायावरून मोटारीचे चाक गेले. मोटारचालक अपघातस्थळावरून पळून गेला. याप्रकरणी गार्गीच्या पालकांनी महात्मा फुले पोलिस ठाण्यात तक्रार दाखल केली आहे.

दुसऱ्या घटनेत, निळजे येथील अनिकेत देशमुख (वय ३६) हे दुचाकीवरून शिळफाटा रस्त्याने जात होते. यावेळी एक्सपेरिया मॉलजवळ एका मोटारीने त्यांना धडक दिली. त्यांच्या उजव्या पायाला गंभीर इजा झाली आहे. त्यांनी मानपाडा पोलिस ठाण्यात तक्रार नोंदवली आहे. गेल्या काही महिन्यांपासून कल्याण-डोंबिवलीत वेगाने वाहन चालविणाऱ्यांचे प्रमाण वाढले आहे. नागरिक अशा चालकांवर कठोर कारवाईची मागणी करीत आहेत.