परशुराम आर्थिक विकास महामंडळाच्या अध्यक्षपदी आशीष दामले

परशुराम आर्थिक विकास महामंडळाच्या अध्यक्षपदी आशीष दामले
बदलापूर, ता. १६ (बातमीदार) ः ब्राह्मण समाजासाठी राज्य शासनाकडून परशुराम आर्थिक विकास महामंडळाची स्थापना करण्यात आली. महामंडळाच्या अध्यक्षपदी बदलापूरचे आशीष दामले यांची निवड करण्यात आली आहे.
सप्टेंबर महिन्यात राज्य सरकारने विविध जाती आणि समूहांसाठी, आर्थिक विकास महामंडळाची स्थापना केली. इतर सगळ्या समाजांप्रमाणे ब्राह्मण समाजासाठी परशुराम आर्थिक विकास महामंडळाची स्थापना करण्याचा निर्णय या मंत्रिमंडळ बैठकीत घेण्यात आला. ब्राह्मण समाजातील आर्थिकदृष्ट्या दुर्बल असणाऱ्या तरुण व तरुणींना शैक्षणिक तसेच, व्यवसायासाठी, महामंडळाच्या माध्यमातून आर्थिक मदत देण्याचा प्रयत्न या माध्यमातून केला जाणार आहे. या महामंडळाचे कार्यालय पुणे या ठिकाणी प्रस्तावित करण्यात आले असून या महामंडळासाठी ५० कोटींचे भागभांडवल दिले जाणार आहे.
या महामंडळाच्या अध्यक्षपदी बदलापूरचे आशीष दामले यांची निवड करण्यात आली आहे. यापूर्वी दामले यांनी कुळगाव- बदलापूर नगरपालिकेचे उपनगराध्यक्षपददेखील भूषविले आहे. या निवडबद्दल त्यांचे सर्वस्तरांतून अभिनंदन केले जात आहे.
कोट
राज्याचे उपमुख्यमंत्री अजित पवार यांचा मी मनापासून ऋणी आहे. त्यांनी दिलेली जबाबदारी मी प्रयत्नपूर्वक प्रामाणिकपणे पार पाडेन, त्याचबरोबर या महामंडळाच्या माध्यमातून, ब्राह्मण समाजातील दुर्बल घटकांना न्याय देण्याचा माझा प्रयत्न असेल.
- आशीष दामले, अध्यक्ष, परशुराम आर्थिक विकास महामंडळ