‘ही मराठी माणसाच्या स्वाभिमानाची लढाई आहे’

‘ही मराठी माणसाच्या स्वाभिमानाची लढाई आहे’
उरण, ता. १७ (वार्ताहर) ः ही लढाई नुसती उरणची नाही, तर महाराष्ट्राच्या आणि मराठी माणसाच्या स्वाभिमानाची लढाई आहे. ही क्रांतिकारकांची भूमी आहे. स्वातंत्र चळवळीचे महत्त्व या भूमीला आहे. संयुक्त महाराष्ट्राच्या लढ्यामध्ये महाराष्ट्रातले कार्यकर्ते लढले आहेत. या लढ्यात आगरी समाजाच्या कार्यकर्त्यांचे योगदान आहे. त्यामुळे आपल्या हक्काचा उमेदवार मनोहर भोईर यांना विधानसभेत पाठवा. त्यांना भरघोस मतांनी विजयी करा, असे आवाहन शिवसेनेचे नेते संजय राऊत यांनी उरण येथे केले. महाविकास आघाडीचे उरण मतदारसंघाचे अधिकृत उमेदवार माजी आमदार मनोहर भोईर यांच्या प्रचारार्थ शनिवारी (ता. १६) उरण येथील एन. हायस्कूलच्या मैदानात जाहीर सभा आयोजित केली होती. यावेळी खासदार संजय राऊत बोलत होते. आपल्या महाविकास आघाडीच्या विजयासाठी एक एक आमदार महत्त्वाचा आहे. त्यासाठी मनोहर भोईर यांची हक्काची ही उरणची जागा कोणत्याही परिस्थितीत आपल्याला जिंकायची आहे. हा आवाज विधानसभेत जायला पाहिजे, असे त्‍यांनी सांगितले.