मतदानासाठी चोख पोलिस बंदोबस्त

मतदानासाठी चोख पोलिस बंदोबस्त
१०,९३५ पोलिस कर्मचारी, ४,१६१ होमगार्ड, फिरती २४ पथके तैनात
ठाणे, ता. १९ (वार्ताहर) : विधानसभा निवडणुकीच्या पार्श्वभूमीवर कोणताही अनुचित प्रकार घडू नये, यासाठी ठाणे पोलिसांनी चोख बंदोबस्ताची योजना आखली आहे. ठाणे जिल्ह्यात मतदान प्रक्रियेसाठी १० हजार ९३५ पोलिस अधिकारी आणि कर्मचाऱ्यांसह चार हजार १६१ होमगार्ड आणि २४ पोलिसांची भरारी पथके तैनात ठेवली आहेत. सुरक्षेसाठी अत्याधुनिक यंत्रांचाही वापर करण्यात येणार आहे.

विधानसभा निवडणुकीसाठी मतदान प्रक्रिया बुधवारी (ता. २०) सकाळी सात ते सायंकाळी सहा वाजेपर्यंत पार पडणार आहे. मतदान सुरळीत व निर्विघ्नपणे पार पडावे, तसेच कायदा व सुव्यस्थेचा प्रश्न निर्माण होऊ नये, यासाठी ठाणे शहर पोलिस आयुक्तालयाने चोख व्यवस्था ठेवली आहे. ठाणे पोलिस आयुक्तालयातील एकूण ७,९८० पोलिस अधिकारी व अंमलदार तैनात केले आहेत. ४,१६१ होमगार्ड, पोलिसांची २४ भरारी पथके, राज्य राखीव पोलिस दल तीन, केंद्रिय औद्योगिक सुरक्षा दल पाच, केंद्रिय राखीव पोलिस दल तीन, सीमा सुरक्षा दल चार, उत्तराखंड राज्य राखीव दल तीन अशा एकूण १८ कंपन्या, अतिरिक्त मनुष्यबळदेखील तैनात केले आहे.