मतदानाचा हक्क आवर्जून बजवा

मुंबई, ता. १९ ः मुंबई शहर जिल्ह्यातील दहा मतदारसंघांमध्ये होणाऱ्या मतदानासाठी मुंबई शहर जिल्हा प्रशासनाची सर्व तयारी पूर्ण झाली आहे. लोकशाहीच्या या उत्सवात जिल्ह्यातील सर्व मतदारांनी उत्स्फूर्तपणे सहभागी होऊन आपल्या मतदानाचा हक्क आवर्जून बजावावा, असे आवाहन मुंबई शहराचे जिल्हाधिकारी तथा अतिरिक्त जिल्हा निवडणूक अधिकारी संजय यादव यांनी केले आहे.
मतदान मुक्त, निष्पक्ष, पारदर्शक व शांततामुक्त वातावरणात होण्यासाठी जिल्हा प्रशासनाने केलेल्या तयारीचा यादव यांनी आढावा घेतला. मुंबई शहर जिल्ह्यात येणाऱ्या दहा विधानसभा मतदारसंघांत एकूण १०५ उमेदवारासाठी २५ लाख ४३ हजार ६१० मतदार दोन हजार ५३८ मतदान केंद्रांवर आपल्या मतदानाचा अधिकार बजावतील. मुंबई शहर जिल्ह्याअंतर्गत असलेल्या दहा विधानसभा मतदारसंघांत २० नोव्हेंबर रोजी होणाऱ्या मतदानासाठी मतदान केंद्राला प्रत्येकी एक असे २,५३८ बीएलओ आहेत. एकूण ३६४ क्षेत्रीय अधिकारी आहेत. जवळपास १२ हजार ५०० पेक्षा अधिक मनुष्यबळ निवडणुकीसाठी उपलब्ध आहे.