समाजमाध्यमांवर उमेदवारांचा प्रचार सुरुच!

समाजमाध्यमांवर उमेदवारांचा प्रचार सुरूच!
निवडणूक आयोगाचे मात्र साफ दुर्लक्ष

बदलापूर, ता. १९ (बातमीदार) : विधानसभा निवडणुकीसाठी बुधवारी (ता. २०) मतदान होणार आहे. नियमाप्रमाणे मतदानाच्या साधारण ३६ तास आधी प्रचार बंद होतो. त्याप्रमाणे यंदा प्रचाराच्या तोफा सोमवारी (ता. १८) सायंकाळी ५.३० वाजता थंडावल्या; मात्र बदलापूर शहरात व्हॉट्सॲप आणि इतर समाजमाध्यमांतून उमेदवारांचा प्रचार अजूनही सुरू आहे. त्यामुळे नियम मोडणाऱ्या कार्यकर्त्यांवर निवडणूक आयोग कारवाई करणार का, असा सवाल उपस्थित होत आहे.

नियमाप्रमाणे मतदानाच्या ३६ तास आधी प्रचार थांबवला जातो. यावेळेत एकीकडे प्रत्यक्ष मतदानाची प्रक्रिया करण्याची धडपड असते, तर दुसरीकडे मतदान कोणाला करायचे, याबाबत मतदारराजाच्या मनाची तयारी सुरू असते आणि या काळात कोणत्याही पक्षाने प्रचार करू नये, अशा कडक सूचना आणि नियम आहेत; मात्र मुरबाड मतदारसंघासाठी होणाऱ्या मतदान प्रक्रियेत उमेदवारांच्या कार्यकर्त्यांकडून निवडणूक आयोगाच्या या नियमांना केराची टोपली दाखवण्यात येत आहे. समाजमाध्यम आणि व्हॉट्सॲपसारख्या प्रभावी माध्यमांवर काही पक्ष कार्यकर्ते मतदान करताना काय काळजी घ्यावी, या आशयाचे मेसेज टाकत आहेत. त्याखाली आपल्या पक्षाच्या उमेदवारालाच मतदान करा, अशा सूचनादेखील करत आहेत.