निवडणूक कर्मचाऱ्यांना ‘बेस्ट’ सुविधा

सकाळ वृत्तसेवा
मुंबई, ता. १९ ः निवडणुकीच्या कामासाठी बेस्टकडून ६५७ बस उपलब्ध करून दिल्या जाणार आहेत. निवडणूक कर्तव्यावरील अधिकारी-कर्मचारी, पोलिस तसेच दिव्यांग मतदार, ज्येष्ठ नागरिकांना मतदान केंद्रांवर सहज पोहोचता यावे, यासाठी ‘बेस्ट’कडून ही सुविधा देण्यात आली आहे; पण बेस्टच्या ताफ्यात मुळातच बस कमी असल्याने मुंबईकरांची गैरसोय होण्याची शक्यता आहे.
निवडणुकीच्या कामासाठी बेस्टकडून ६५७ बसपैकी ४२ आसने असलेल्या २३० बस, ३० आसने असलेल्या ४२७ मिडी बस यांचा समावेश आहे. मिडी बसपैकी १२१ बस या नॉन एसी, तर ३०६ एसी बस तैनात असणार आहेत. तर, गरज भासल्यास ज्यादा बसचे नियोजन करण्याची तयारीही बेस्ट उपक्रमाने दाखवली आहे. त्यामुळे पूर्व आणि पश्चिम उपनगरांतीलच मतदार तसेच कर्मचारी अधिकाऱ्यांसाठी विनामूल्य सेवा दिली आहे. मतदान केंद्रावर मतदानासाठी जाणाऱ्या दिव्यांग, ज्येष्ठ नागरिकांना नक्कीच फायदा होणार आहे; पण दैनदिन कामांसाठी बेस्टने प्रवास करणाऱ्या प्रवाशांना त्रास होण्याची शक्यता आहे.
----------------------------
ठरावीक मार्गांवरील थांबे निश्चित
प्रत्येक मतदारसंघात विशेष बससाठी मतदानाच्या दिवशी ठरावीक मार्गिका उपलब्ध करून देण्यात आल्या आहेत. तसेच, मतदारसंघनिहाय मतदान केंद्रांनुसार बेस्टकडून बसथांबेही निश्चित केले गेले आहेत.
---------------------------------
दिव्यांगांसाठी विशेष व्यवस्था
निवडणुकीच्या दिवशी दिव्यांग व्यक्तींसाठी मुंबईत १,२८४ ठिकाणांपासून मतदान केंद्रापर्यंत वाहन व्यवस्था करण्यात आली आहे. त्यांच्यासाठी ९९२ वाहनांची व्यवस्था करण्यात आली आहे.