तोतया पोलिसांनी केली मनसेची शाखा बंद

तोतया पोलिसांनी केली मनसेची शाखा बंद

सकाळ वृत्तसेवा
डोंबिवली, ता. १९ : कल्याण ग्रामीणमधील आडीवली ढोकळी परिसरातील मनसेची शाखा मंगळवारी (ता.१९) दुपारी तोतया पोलिसांनी बंद केल्याची घटना घडली. यावेळी आरोपी हे या शाखेतील मतदार याद्या आणि वोटर स्लिप घेऊन गेले. या घटनेमुळे मनसेचे उमेदवार राजू पाटील संतापले, विरोधक सत्ताधारी अशा खेळी खेळत असतील तर उद्या मनसेची फौज मैदानात उतरवू, असा इशाराच राजू पाटील यांनी यावेळी दिला आहे.

आमदार राजू पाटील म्हणाले, ‘पोलिस अशी शाखा बंद करू शकत नाही. कारण इथे काही गैरप्रकार चालू नव्हते. दुपारच्या सुमारास इथे काही जण पोलिसांच्या वेशात आले आणि येथील याद्या आणि व्होटर स्लिप घेऊन गेले. सत्ताधारी पोलिसांना हाताशी धरून असा खेळ करत असतील तर मग आम्ही पण येथे उद्या फौज उतरवतो. सत्ताधारी येथे पैसा वाटतात; हे थांबले नाही तर आम्ही रस्त्यावर उतरू, पोलिसांनी हा वॉर्ड संवेदनशील जाहीर करून येथे गस्त वाढवावी.’ याविषयी अतिरिक्त पोलिस आयुक्त संजय जाधव यांना विचारले असता पोलिसांनी असे काहीही केलेले नाही. पोलिस याठिकाणी गेलेले नाहीत. दरम्यान या घटनेची सखोल चौकशी होते का. हे तोतया पोलिस कोण होते, त्यांना कोणी पाठवले, सीसीटीव्ही तपासून त्यांचा शोध घेतला जातो का? हे पहावे लागेल.