एन.डी.स्टुडीओ गोरेगाव फिल्मसिटीच्या ताब्यात

मुंबई, ता. २८ : दिवंगत कलादिग्दर्शक नितीन देसाई यांनी उभारलेला कर्जत येथील एन. डी. स्टुडिओ महाराष्ट्र चित्रपट, रंगभूमी आणि सांस्कृतिक विकास महामंडळाने परिचालनासाठी ताब्यात घेतला आहे. सांस्कृतिक कार्य विभागाचे अपर मुख्य सचिव विकास खारगे यांनी गुरुवारी एन. डी. स्टुडिओला भेट देऊन येथील कामकाजाची पाहणी केली. त्यामुळे एन. डी. स्टुडिओचे परिचालन व्यवस्थापकीय संचालक स्वाती म्हसे पाटील यांच्या मार्गदर्शनाखाली होणार आहे.
राष्ट्रीय कंपनी विधी प्राधिकरणाने महाराष्ट्र चित्रपट, रंगभूमी आणि सांस्कृतिक विकास महामंडळाने सादर केलेल्या संकल्प योजनेला १४ नोव्हेंबर २०२४ रोजी मान्यता दिल्याने यापुढे एन. डी. स्टुडिओचे दैनदिन प्रशासन, सुरक्षा, चित्रीकरणे, महसूल वाढ, लेखाविषयक कामे शासनाच्या वतीने महामंडळाच्या नियंत्रणाखाली सुरू राहणार आहेत. त्यामुळे हे सर्व कामकाज जाणून घेण्यासाठी खारगे यांच्या नेतृत्वाखालील शिष्टमंडळाने एन. डी. स्टुडिओची प्रत्यक्ष पाहणी केली. यावेळी कार्यरत असलेल्या व्यवस्थापनाच्या अधिकारी-कर्मचाऱ्यांशी संवाद साधून नियमित कार्यप्रणाली समजून घेतली. या पाहणी दौऱ्याकरिता महामंडळाचे सहव्यवस्थापकीय संचालक डॉ. धनंजय सावळकर, उपसचिव महेश व्हावळ, मुख्य लेखा वित्ताधिकारी चित्रलेखा खातू-रावराणे, उपअभियंता (स्थापत्य) विजय बापट, विशेष कार्यकारी अधिकारी संजय कृष्णाजी पाटील, कक्ष अधिकारी अनिरुद्ध देशपांडे उपस्थित होते.
--------------------------------------------
विशेष कृती पथकाची स्थापना
प्रशासकीय आणि विकासात्मक कामांमध्ये सुसूत्रता येण्यासाठी व्यवस्थापकीय संचालक यांच्या सनियंत्रणाखाली विशेष कृती पथकाची स्थापना करण्यात आली आहे. या पथकामध्ये सहव्यवस्थापकीय संचालक समन्वयक, विशेष कार्यकारी अधिकारी उपसमन्वयक, मुख्य प्रशासकीय अधिकारी, मुख्य लेखावित्ताधिकारी, उपअभियंता (स्थापत्य), उपअभियंता (विद्युत) आदी अधिकारी सदस्य म्हणून काम पाहणार आहेत. तसेच, वित्तीय, विधी, आयटी, मनुष्यबळ आदी क्षेत्रातील तज्ज्ञ सल्लागारांचादेखील समावेश आहे.