स्वामी समर्थांची पावले उमटल्याचा व्हिडीओ व्हायरल

स्वामी समर्थांची पावले
उमटल्याचा व्हिडिओ व्हायरल
महिलेवर जादूटोणाविरोधी कायद्यान्वये गुन्हा
पनवेल, ता. ३ (वार्ताहर) : आपल्या घरी स्वामी समर्थांची पावले उमटल्याचा तसेच पोथीमधून अंगारा-विभूती निघत असल्याचा दावा करीत त्याबाबत व्हिडिओ समाज माध्यमांवर नुकताच व्हायल झाला होता. समाजात अंधश्रद्धा पसरविणाऱ्या या महिलेविरोधात महाराष्ट्र अंधश्रद्धा निर्मूलन समितीच्या तक्रारीवरून पनवेल शहर पोलिस ठाण्यात गुन्हा दाखल करण्यात आला.
ही महिला पनवेल परिसरात वास्तव्यास आहे. नुकतेच २३ नोव्हेंबर रोजी पहाटेच्या सुमारास आपल्या घरी साक्षात स्वामी समर्थ आल्याचा आणि पोथीतून मोठ्या प्रमाणात अंगारा-विभूती निघत असल्याचा दावा त्या महिलेने केला. हा चमत्कार घडल्याचे दाखविण्यासाठी या महिलेने स्वामी समर्थांच्या पावलांचे ठसे आणि विभूतीचा ढीग दाखविणारा व्हिडिओ समाज माध्यमांवर व्हायरल करण्यात आला. त्यानंतर या महिलेच्या घरी दर्शनासाठी भक्तांची गर्दी झाली होती.
समाजात अंधश्रद्धा पसरविणारा कथित व्हिडिओ पनवेल येथील महाराष्ट्र अंधश्रद्धा निर्मूलन समितीच्या कार्यकर्त्यांच्या निदर्शनास आला. ती महिला चमत्कार झाल्याचे भासवून लोकांची दिशाभूल करीत असल्याबाबत त्यांनी पनवेल शहर पोलिस ठाण्यात तक्रार दाखल केली. त्यावरून पोलिसांनी महिलेविरोधात जादूटोणाविरोधी कायद्यानुसार गुन्हा दाखल करून तपासाला सुरुवात केली आहे.
------
घरात स्वामी समर्थांची पावले उमटल्याचे तसेच पोथीतून विभूती निघत असल्याचा दावा करीत महिला लोकांची दिशाभूल करीत आहे. या महिलेविरोधात पोलिसांत तक्रार केली आहे. महिलेने चमत्कार सिद्ध करून दाखवल्यास अंनिसकडून २१ लाखांचे बक्षीस देण्यात येईल.
- मनोहर तांडेल, अंनिस, पनवेल.