डिजिटल अटकेच्या भीतीने गंडवले

नवी मुंबई, ता. ५ (वार्ताहर): वाशीतील एका ७२ वर्षीय ज्येष्ठ नागरिकाला डिजिटल अटक केल्याचे भासवत गंडवल्याचा प्रकार घडला आहे. तसेच बँक खात्यातील एक कोटी ८८ लाखांची रक्कम तपासणी करण्याच्या बहाण्याने लंपास केली आहे.
सायबर टोळीतील एका महिलेने ट्रायमधून बोलत असल्याचे भासवून वाशीत राहणाऱ्या ज्येष्ठ नागरिकाशी संपर्क साधला होता. आधार कार्डवरून दोन मोबाइल फोन लिंक झाल्याने तसेच दुसऱ्या मोबाइलवरून अश्लील कॉल संदेश पाठवल्याने त्यांच्याविरोधात गुन्हा दाखल झाल्याची भीती दाखवली तसेच त्यांना कुलाबा पोलिस स्टेशनच्या वरिष्ठ महिला अधिकाऱ्यांशी बोलण्यासाठी कॉल जोडून देण्यात येत असल्याचे भासवले. त्यानंतर दुसऱ्या महिलेने वरिष्ठ पोलिस अधिकारी असल्याचे भासवून त्यांच्याविरोधात ईडीने तक्रार दाखल केल्याचे सांगण्यात आले. या वेळी ज्येष्ठ नागरिकाच्या विरोधात अटक वॉरंट निघाल्याचे बनावट पत्र पाठवताना सीबीआयकडून डिजिटल अटक केल्याचे सांगितले. त्यामुळे घाबरलेल्या ज्येष्ठ नागरिकाने याबाबतची माहिती कुणालाही दिली नाही.
-----------------------------------------------
वेगवेगळ्या कारणांसाठी पैशांची मागणी
सायबर टोळीने त्यांच्याकडील संपत्तीबाबत चौकशी करताना वेगवेगळ्या कारणांसाठी पैसे मागण्यास सुरुवात केली. अशा तऱ्हेने जवळपास १ कोटी ८८ लाखांची फसवणूक करण्यात आली. पण आपली फसवणूक होत असल्याचा संशय ज्येष्ठ नागरिकाला आल्याने बाहेरगावी असलेल्या भावाला सर्व प्रकाराची माहिती दिली होती. त्यानंतर नातेवाइकाच्या मदतीने सायबर पोलिस ठाण्यात याबाबत तक्रार दाखल करण्यात आली.