ट्रेलरचा टायर फुटल्याने तलासरी उड्डाणपुलावर कोंडी

कासा, ता. ७ (बातमीदार) : मुंबई-अहमदाबाद महामार्गावर सिमेंट- काँक्रीटच्या अर्धवट कामामुळे वाहन अपघातांच्या घटना वारंवार घडत आहेत. गुजरातहून मुंबईकडे जाणाऱ्या मालवाहू कंटेनरचा टायर शुक्रवारी (ता. ६) दुपारी तलासरी उड्डाणपुलाजवळ अर्धवट कामामुळे फुटल्यामुळे ट्रेलर अपघातग्रस्त झाला. परिणामी, महामार्गावर मोठ्या प्रमाणात वाहतूक कोंडी निर्माण झाली होती.

महामार्गावर अनेक ठिकाणी सिमेंट- काँक्रीटचे काम अपूर्ण असल्याने एकेरी वाहतूक सुरू आहे. काही ठिकाणी उलट दिशेने वाहतूक चालवली जात आहे; परंतु तेथे कोणत्याही प्रकारचे सूचनाफलक लावलेले नाहीत. यामुळे वाहनचालक अंदाजाने वाहन चालवतात. परिणामी, रोजच अपघात होत आहेत. वाहनचालकांनी वारंवार सूचनाफलक लावण्याची व स्वयंसेवक नेमण्याची मागणी केली आहे; पण कंत्राटदार आणि महामार्ग प्राधिकरण याकडे दुर्लक्ष करत आहेत. अपूर्ण कामामुळे अनेक वाहनांचे टायर फुटत आहेत, तर अपघातांमुळे प्रवाशांचा जीव धोक्यात येत आहे.

शुक्रवारी झालेल्या घटनेत टायर फुटल्याने तलासरी उड्डाणपुलावर ट्रेलर बराच वेळ उभा राहिला, ज्यामुळे महामार्गावर वाहनांची लांबच लांब रांग लागली; मात्र महामार्ग प्राधिकरण आणि कंत्राटदार उपाययोजनांबाबत तत्काळ पावले उचलत नाहीत. वाहनचालकांनी यावर तीव्र नाराजी व्यक्त केली असून, प्रवास सुरक्षित करण्यासाठी तत्काळ उपाययोजना करण्याची मागणी केली आहे.