अल्पवयीन मुलीचे अश्लिल व्हिडियो व्हायरल

अल्पवयीन मुलीचे अश्लील व्हिडिओ व्हायरल
उत्तर प्रदेशातील आरोपी तरुणाचा पोलिसांकडून शोध सुरू

नवी मुंबई, ता. ७ (वार्ताहर) : उत्तर प्रदेशमध्ये राहणाऱ्या एकाने १७ वर्षीय अल्पवयीन मुलीसोबत इन्स्टाग्राम, फेसबुक तसेच व्हॉट्सॲपवरून ओळख वाढवून मैत्री करून तिचे अश्लील फोटो, व्हिडिओ सोशल मीडियावरून व्हायरल केल्याचा धक्कादायक प्रकार उघडकीस आला आहे.
दीपू शेषनाथ चौधरी (वय २२) असे आरोपीचे नाव आहे. तुर्भे एमआयडीसी पोलिसांनी या प्रकरणातील आरोपीविरोधात गुन्हा दाखल करून त्याचा शोध सुरू केला आहे.

१७ वर्षीय पीडित मुलगी तुर्भे परिसरात राहण्यास असून, ती सध्या शिक्षण घेत आहे. पीडित मुलीची सोशल मीडियावरून आरोपी दीपू चौधरी याच्याशी काही महिन्यांपूर्वी ओळख झाली. त्यानंतर त्याने व्हॉट्सॲपद्वारे पीडित मुलीसोबत मैत्री केली. त्यानंतर त्याने बुधवारी (ता. ४) मध्यरात्री पीडित मुलीसोबत व्हिडिओ कॉलवर बोलत तिला कपडे काढण्यास भाग पाडले. यादरम्यान आरोपीने व्हिडिओ व स्क्रिन शॉट काढत हे दुसऱ्या दिवशी सोशल मीडियावर व्हायरल केले. हे व्हिडिओ पीडित मुलीच्या इन्स्टाग्रामवर झळकल्यानंतर पीडितेने ही माहिती आपल्या पालकांना दिली. त्यानंतर त्यांनी तुर्भे एमआयडीसी पोलिस ठाण्यात धाव घेत याबाबत तक्रार दाखल केली. त्यानुसार पोलिसांनी दीपू चौधरी याच्याविरोधात गुन्हा दाखल करून त्याचा शोध सुरू केला आहे.